Il-Pulizija Tarresta Tnejn Fuq Droga B’Valur Ta’ €90,000

Żewġt irġiel; wieħed ta’ 36 sena li jgħix f’Ħal Luqa u ieħor ta’ 31 sena li jgħix f’Birżebbuġa, ġew arrestati lbieraħ wara nofsinhar waqt ħidma mill-Iskwadra ta’ Kontra d-Droga, blassistenza tar-Rapid Intervention Unit.

F’din il-ħidma l-Pulizija sabu aktar minn 1.6kg ta’ droga, bil-valur fit-triq ta’ madwar €90,000.

Huma twaqqfu waqt li kienu f’vettura fuq suspett ta’ traffikar ta’ droga. Waqt tfittxija fil-vettura, il-Pulizija sabet żewġ blokok ta’ sustanza aktarx droga kokaina, b’piż ta’ madwar 1.3kg.

Minn tfittxijiet oħra li saru ġewwa residenza f’Ħal Luqa, il-Pulizija sabet aktar sustanzi aktarx droga; 130 gramma kokaina, 100 gramma weraq tal-pjanta cannabis u 95 gramma raża tal-cannabis.

Dwar il-każ infetħet inkjesta mmexxija mill-Maġistrat Dr Natasha Galea Sciberras, li ħatret l-esperti sabiex jassistuha.

Wieħed mill-persuni mistenni jitressaq il-qorti għada taħt arrest u jkun akkużat fost oħrajn bi traffikar u pussess aggravat tal-istess droga.