Inawgurata Angiosuite Ġdida f’Mater Dei B’Nefqa Ta’ €400,000
Id-Deputat Prim Ministru u Ministru għas-Saħħa, Chris Fearne inawgura angiosuite ġdida fl-Isptar Mater Dei.
Din l-angiosuite saret b’investiment ta’ €400,000, li huma parti minn investiment ta’ €5.5 miljuni għall-upgrade ta’ apparati u tagħmir ġdid fid-Dipartiment tal-Medical Imaging.
Permezz ta’ din l-angiosuite issa jistgħu jsiru numru ta’ interventi speċjalizzati li qabel ma kinux isiru fosthom f’persuni li jkun għadhom kemm tahom stroke. Din il-magna tista’ wkoll tgħin fil-kura għall-kanċer billi tagħti kimoterapija direttament fl-arteriji.
“Matul din is-sena, il-Ministeru għas-Saħħa, kien iffukat, ħdimna u investejna kemm kien possibbli fuq il-Covid-19, iżda ix-xogħol tagħna l-ieħor baqa’ jsir u dan l-investiment fid-Dipartiment tal-Medical Imaging huwa wieħed minnhom”, qal id-Deputat Prim Ministru.
F’Malta jkollna bejn 10 u 15-il intervent kuljum fl-angiosuite.
Iċ-chairman tal-Medical Imaging, Dr Kenneth Saliba, qal li permezz ta’ din l-angio suite dan id-dipartiment se jkun qed ikompli jgħin aktar lill-kirurgi, fosthom dawk tal-qalb u vaskulari, billi jkunu jistgħu jaraw l-arterji tal-ġisem anke dawk żgħar b’mod imkabbar b’hekk ikun hemm aktar preċiżjoni fl-interventi li jsiru.
