Kummenti Perikolużi Wara Li Ira Losco Tkellmet Dwar Meta Sfat Vittma Ta’ Attakk Sesswali F’Lift

 Kummenti Perikolużi Wara Li Ira Losco Tkellmet Dwar Meta Sfat Vittma Ta’ Attakk Sesswali F’Lift

Fl-aħħar jiem Ira Losco rrakkontat fuq Instagram l-esperjenza ta’ attakk sesswali li għaddiet minnha ftit tas-snin ilu waqt li kienet fuq tour mużikali.

Losco qalet li f’jum partikolari daħlet waħedha fil-lift, u malli raha waħedha, l-aggressur, mar jiġri lejn il-lift, żammu u daħal ħdejha.

“Fil-lift idu marret direttament hemm isfel, u jien iffriżajt”, irrakkuntat Ira Losco. Hija qalet li minnufih ħasset sens ta’ disprament u biża u b’hekk bdiet twerżaq u ċċanfar lill-aggressur. Intant, huwa qabdu paniku u ħarab jiġri malli nfetaħ il-lift.

Wara li Losco tkellmet dwar din il-ġrajja fuq Instagram, xi portals irrappurtaw l-istorja tagħha u hemmhekk bdew il-kummenti perikolużi. Kien hemm persuni li rringrazzjaw lil Ira tal-kuraġġ u talli tkellmet dwar din l-esperjenza sabiex tqajjem kuxjenza, iżda kien hemm ukoll persuni li allegaw li Ira qalet dan sabiex tikseb aktar fama. Dawn tal-aħħar huma kummenti perikolużi mmens!

Permezz ta’ kummenti bħal dawn wieħed qed jgħaddi l-messaġġ li meta tfajla, tifla jew mara tgħaddi minn esperjenza simili jkun aħjar li ma tgħid xejn, għax malajr tiġi nterpretata li qed tagħmel dan sabiex tiġbed l-attenzjoni. Kummenti bħal dawn huma kundanabbli għax ikomplu jsikktu lil dik li għaddiet minn esperjenza bħal din u qed issibha bit-tqila biex tagħmel kuraġġ u titkellem ħalli tinħeles mit-toqol.

Hija sitwazzjoni oxxena li fil-konfront ta’ esperjenza bħal din wieħed jagħżel li jiġġudika jew jikkundanna lill-vittma! Ejjew flimkien inqajjmu kuxjenza dwar dan is-suġġett, sabiex inħeġġu aktar nisa jitkellmu dwar l-esperjenzi qarsa tagħhom u jfittxu l-għajnuna meta meħtieġa. Kuraġġ!

Għaddi l-kumment tiegħek dwar dan fuq il-paġna tagħna ta’ Facebook.

Social Media Auto Publish Powered By : XYZScripts.com