Erbgħa Arrestati B’Rabta Ma’ Allegat Traffikar Ta’ 21 kilo Kannabis B’Valur ta’ €420,000
Wara diversi ġimgħat ta’ osservazzjoni, ilbieraħ filgħaxija, il-Pulizija tal-Iskwadra ta’ Kontra d-Droga, assistiti mill-Pulizija tar-Rapid Intervention Unit (RIU), wettqu operazzjoni kontra t-traffikar tad-droga fil-Furjana u f’San Pawl il-Baħar.
F’din il-ħidma, il-pulizija arrestaw erba’ persuni b’rabta ma’ sejba ta’ 21 kilo droga suspettata kannabis, bil-valur fit-triq li kieku din id-droga nbiegħet tlaħħaq l-€420,000.
Kienu għall-ħabta tas-sitta ta’ filgħaxija meta l-pulizija tal-Iskwadra ta’ Kontra d-Droga ċċirkondaw vann fil-Furjana li fih kien hemm żewġt irġiel, Malti ta’ 47 sena residenti l-Isla u Taljan ta’ 32 sena residenti San Pawl il-Baħar.
Minn tfittxija li saret fil-vettura, instabu żewġ kaxxi ssiġillati, waħda b’fridge u oħra b’chest freezer, u malli l-pulizija fetħuhom sabu 20 pakkett b’sustanza aktarx droga kannabis.
Il-ħidma b’rabta mal-operazzjoni fil-Furjana tkompliet f’garaxx u f’dar, San Pawl il-Baħar.
Mal-wasla tal-pulizija tar-RIU, żewġt irġiel Taljani, ta’ 23 u 29 sena, li kienu fuq il-post ippruvaw jaħarbu iżda twaqqfu u ġew arrestati. Fil-garaxx instabu kaxxi simili ta’ dawk li nstabu fil-vann, u fid-dar instabet aktar sustanza ta’ droga kannabis.
Il-Maġistrat tal-Għassa Dr Gabriella Vella ġiet infurmata bil-każ u ħatret inkjesta.
L-irġiel qed jinżammu arrestati fil-Kwartieri Ġenerali tal-Pulizija, il-Furjana, u mistennija jitressqu l-Qorti fil-jiem li ġejjin.
L-investigazzjonijiet għadhom għaddejjin.
