Minn Ġunju Mistenni Jibda’ Servizz Ta’ Fast Ferry Bejn Il-Port Il-Kbir, Il-Belt U Għawdex
Wara li indirizza l-midja aktar kmieni llum, il-Ministru għat-Trasport u Proġetti Kapitali Ian Borg ħabbar li l-gvern se jkun qed jinvesti €5 miljun għal struttura marittima li toffri s-servizz tal-fast ferry. Dan il-mezz ta’ trasport tant mistenni jidher li fl-aħħar wasal.
Filwaqt li qal li se jkun qed jiġi żgurat li twettiq ta’ dan il-proġett jsir bl-aktar mod trasparenti, il-Ministru Borg appella għal operaturi li huma nteressati li jieħdu ħsieb li joffru dan is-servizz. Dawn l-operaturi se jkunu mistennija li jibdew jipprovdu dan is-servizz mill-1 ta’ Ġunju 2021, diment li jikkonformaw ma’ kriterji speċifiċi stabbiliti mill-Awtorità tat-Trasport. L-Avviż tal-Port, li huwa r-riżultat ta’ tliet offerti li ġew miċħuda, ħareġ wara deċiżjoni li ittieħed mill-Kabinett sabiex jilliberalizza s-suq tat-tbaħħir fuq din ir-rotta speċifika.
Flimkien mal-Ministru Clint Camilleri, Ministru għal Għawdex, daħal fid-dettal ta’ dan is-servizz il-Ministru Ian Borg u ddikjara li dan il-servizz se jkun qed isir bejn il-Port il-Kbir, il-Belt Valletta u l-Port tal-Imġarr permezz ta’ fast ferry dirett li se jkun disponibbli għall-passiġġieri biss. Barra minn hekk, il-gvern qed jaħdem biex ikun hemm sejħa internazzjonali pubblika għas-servizz tal-Obbligu tas-Servizz Pubbliku bejn il-gżejjer, li jkunu jinkludu t-trasport ta’ vetturi privati u oħrajn.
Fi stqarrija Dr Camilleri spjega li filwaqt li l-lanċa mistennija tieħu inqas minn 45 minuta ta’ vjaġġar, huwa jemmen li dan is-servizz jissodisfa l-ħtieġa li jkollna konnettività li se toffri aktar effiċjenza u kumdità lill-ħaddiema Għawdxin u studenti.
