Żewġ Nisa; 47 Sena u 72 Sena Arrestati B’Rabta Ma’ Traffikar Tad-Droga

Żewġ nisa ġew arrestati b’rabta ma’ traffikar tad-droga

Żewġ nisa, ta’ 47 u 72 sena, ġew arrestati mill-Pulizija tal-Iskwadra ta’ Kontra d-Droga wara li nqabdu b’ammont ta’ droga, lesta għat-traffikar.

Wara jiem ta’ osservazzjoni u investigazzjonijiet, tard billejl ilbieraħ, il-Pulizija mill-Iskwadra ta’ Kontra d-Droga ċċirkondaw residenza fil-Kalkara.

Tfittxija fir-residenza wasslet biex instabu diversi qratas b’sustanza suspettata droga kokaina lesta biex tiġi ttraffikata. Ammont ieħor tal-istess droga nstabet moħbija fl-istess residenza.

Il-Maġistrat tal-Għassa Dr Rachel Montebello ġiet infurmata rigward il-każ u ħatret inkjesta filwaqt li l-investigazzjonijiet tal-Pulizija għadhom għaddejjin.

Iż-żewġ nisa qegħdin jinżammu fil-Kwartieri Ġenerali tal-Pulizija, il-Floriana għal aktar stħarriġ.