Skemi Għal Proġetti Tal-Programm LIFE Immirati Lejn NGOs
Ġew imnedija żewġ skemi nazzjonali mmirati sabiex iħajru iktar sħubija Maltija fi proġetti tal-programm ambjentali LIFE. Dawn l-iskemi se jkunu qegħdin joffru assistenza u fondi lill-għaqdiet mhux governattivi għal proġetti ambjentali.
Il-Ministru għall-Ambjent, it-Tibdil fil-Klima u l-Ippjanar, Aaron Farrugia ddiskriva l-ħidma ta’ dawn l-għaqdiet u l-organizzazzjonijet volontarji bħala indispensabbli. Għaldaqstant spjega kif il-Gvern ser ikun qiegħed joffri għajnuna finanzjarja sabiex dawn l-għaqdiet ikollhom opportunitajiet u appoġġ għall-proġetti li huma ta’ prijorità għal Malta.
L-ewwel skema hija sejħa ta’ għotja ta’ kofinanzjament mill-ministeru għal proġetti LIFE, li qed toffri appoġġ finanzjarju lill-għaqdiet mhux governattivi li l-operazzjonijiet tagħhom jinvolvu l-konservazzjoni ambjentali u l-promozzjoni tagħha.
Min-naħa l-oħra, it-tieni skema toffri għajnuna għall-kitba ta’ proposta LIFE. Din hija ddisinjata biex toffri għajnuna finanzjarja sabiex ikunu jistgħu jingħataw servizzi professjonali għall-kitba tal-proposti ta’ proġetti ffinanzjati minn LIFE.
Applikazzjonijiet għal dawn il-fondi se jiġu kkunsidrati fuq il-bażi tal-kontribuzzjoni tagħhom għal prijoritajiet ambjentali; l-immaniġġjar ta’ siti Natura 2000; mitigazzjoni u adattament għat-tibdil fil-klima; infrastruttura ekoloġika; effiċjenza fl-enerġija; ġestjoni tal-iskart u skart tal-baħar; u afforestazzjoni.
L-għan aħħari wara dawn il-fondi huwa li jkun hemm iktar applikazzjonijiet ta’ proġetti b’saħħithom li jirnexxilhom ikunu ta’ suċċess fl-applikazzjoni tal-programm LIFE, bir-riżultat finali jkunu proġetti effettivi sabiex jintlaħqu l-għanijiet ambjentali u jitnaqqsu l-impatti tat-tibdil fil-klima.
Għal iktar tgħarif dwar dan wieħed jista’ jagħmel kuntatt mal-LIFE Unit ġewwa l-Ministeru għall-Ambjent, it-Tibdil fil-Klima u l-Ippjanar fuq [email protected] jew 23316239.
