Jinstab Flixkun B’Messaġġ F’Qiegħ Il-Baħar, Li Għandu ’L Fuq Minn 95 Sena
L-għaddasa Jennifer Dowker irnexxilha ssib flixkun li kellu messaġġ partikolari f’qiegħ il-baħar! Il-messaġġ li għandu ’l fuq minn 95 sena jsaqsi jekk il-persuna li ssib dan il-flixkun kinitx se tagħti lura din il-karta lil George Morrow, li joqgħod Cheboygan f’Michigan u tgħid fejn sabitha.
Il-flixkun instab f’Cheboygan River, f’Michigan, fl-Istati Uniti. Wara li Dowker qasmet fuq il-midja soċjali dak li kienet sabet bit-tama li ssib lill-persuna msemmija, it-tifla ta’ George Morrow, Michele Primeau, ta’ 74 sena kelmitha lura!
Bint Morrow tgħid li għarfet il-kitba ta’ missierha u tgħid kif missierha, li kellu karattru sentimentali kien jikteb noti u jħallihom f’diversi postijiet.
Il-kittieb ta’ dan il-messaġġ, George Morrow ħalla din id-dinja fl-1995, iżda għemilu ferraħ lil bintu, kif ukoll lil għaddasa li rnexxilha ssib dan il-messaġġ. L-għaddasa tistqarr li se tibqa’ tgħid l-istorja ta’ din is-sejba lill-klijenti għaddasa tagħha sabiex huma ukoll jitħajjru jagħmlu l-avventuri tagħhom f’qiegħ il-baħar!
Ritratti: Kennedy News and Media
