Plejer Tad-Danimarka Jintilef Minn Sensih Waqt Il-Partita Bejn Id-Danimarka U L-Fillandja

Mument xokkanti waqt it-tielet partita tal-Euro 2020 bejn id-Danimarka u l-Fillandja meta l-plejer tad-Danimarka Christian Eriksen  fit-43 minuta waqa’ minn tulu fl-art waħdu.

Kien fil-mument x’ħin Eriksen kien qiegħed joqrob lejn il-linja laterali sabiex jirċievi ballun minn thrown-in x’ħin deher jaqa’ fl-art.

Malli l-plejers indunaw b’li ġralu Eriksen mill-ewwel għajtu lit-tobba u l-fiżjoterapisti Daniżi u daru mal-midfielder. Kienu diversi l-plejers li dehru bid-dmugħ f’għajnejhom u ma jistgħux jemmnu dak li kienu qed jesperjenzaw.

Minbarra l-plejers, kemm l-uffiċjali tal-logħba u anke dawk kollha li kienu fil-grawnd dehru maħsuda b’dak li kienu qed jaraw iseħħ quddiemhom. Magħhom kien hemm il-mara t’Eriksen, Sabrina Kvist li dehret tibki mat-touchline, bil-captain Kjaer u l-goalkeeper Schmeichel isabbruha.

Wara minuti ta’ tensjoni l-plejer t’Inter inħareġ mill-grawnd. Christian Eriksen deher ħiereġ mill-grawnd fuq stretcher bl-ossiġnu ma’ ħalqu u għajnejh dehru miftuħin.