Il-Konkorsi Kanzunetta Indipendenza Jirritornaw Fuq Il-Fosos
Fi stqarrija ġie konfermat li għal sena oħra matul ix-xahar ta’ Settembru ser jiġu organizzati l-Konkorsi Kanzunetta Indipendenza.
Il-Konkors Kanzunetta Indipendenza u l-Konkors Kanzunetta Indipendenza Junior huma żewġ avvenimenti importanti fil-kalendarju tal-mużika u lirika oriġinali Maltija. Din is-sena, wara nuqqas ta’ tliet snin, dawn iż-żewġ konkorsi ser ikunu qed jirritornaw fuq il-Fosos tal-Floriana.
Naturalment, dan ikun possibbli dejjem b’rispett sħiħ u sakemm ikunu jippermettu l-linji gwida mogħtija mill-Awtoritajiet tas-Saħħa b’rabta mal-imxija tal-Covid 19.
L-applikazzjonijiet għaż-żewġ konkorsi se jiftħu nhar it-Tnejn 19 ta’ Lulju, mill-5.00pm ’l quddiem u jkunu jistgħu jinkisbu mir-reception ta’ MediaLink Communication.
Is-serati finali taż-żewġ konkorsi se jsiru nhar is-17 u t-18 ta’ Settembru.
B’kollox se jkunu qed jieħdu sehem 40 finalista maqsuma fuq iż-żewġ konkorsi.
