‘Rainforest Cafe’ Jiftaħ Il-Bibien Tiegħu F’Pajjiżna
Rainforest Cafe jinsab uffiċjalment f’Malta u beda jilqa’ fi ħdanu l-ewwel klijenti li huma lesti għal avventura fil-qalba ta’ San Ġiljan. Il-ftuħ uffiċjali ta’ dan ir-restorant internazzjonali sar l-Erbgħa filgħaxija f’Bay Street Complex fejn preżenti kien hemm ukoll il-Ministru għat-Turiżmu u l-Protezzjoni tal-Konsumatur, l-Onor. Clayton Bartolo.
“Huwa ta’ unur kbir li finalment nistgħu niftħu din id-destinazzjoni avventuruża għall-publiku Malti. Ilna ħafna naħdmu sabiex Rainforest Cafe jsib postu f’Malta b’suċċess, u filwaqt li l-pandemija ġabet magħha diversi sfidi, issa ninsabu kuntenti li dawk kollha li se jkunu qed iżuru Bay Street Complex għandhom post ieħor fejn jistgħu jqattgħu ħinhom,” qal Albert Galea, il-Kap Eżekuttiv ta’ Bay Street Group.
Il-franchise ta’ Rainforest Cafe jinsab f’uħud mill-aktar ibliet notevoli madwar id-dinja inkluż f’Londra, Niagara Falls, Tokyo u Pariġi. Meta wieħed iżur Rainforest Cafe, bħal donnu jidħol f’foresta tropikali fejn anke jiltaqgħu ma’ figuri ta’ daqs reali ta’ annimali li tipikament jinstabu f’dawn il-foresti tropikali, inkluż tigri, sriep, kukkudrilli, żrinġijiet u għasafar tropikali. Dawk kollha li jmorru jieklu għand Rainforest Cafe saħansitra jistgħu jesperjenzaw l-effetti ta’ maltempati bir-ragħad filwaqt li jieklu ikla tal-għażla tagħhom. Il-menu ta’ Rainforest Cafe huwa varjat u joffri għażla vasta ta’ għaġin, ħut, burgers u anke deżerti varji.
F’kelmtejn tal-okkażjoni, il-Ministru għat-Turiżmu u l-Protezzjoni tal-Konsumatur Clayton Bartolo saħaq kif dan il-kumpless huwa monument ħaj ta’ nies li minkejja l-pandemija baqgħu għaddejjin bl-investiment tagħhom. “Dan kollu huwa turija ċara ta’ settur privat li huwa reżiljenti. Inwegħdukom li ser issibuna magħkom biex dak l-investiment li tkunu għamiltu jissarraf fi storja ta’ suċċess,” irrimarka l-Ministru Clayton Bartolo.
Għal aktar informazzjoni żur https://rainforestcafemalta.com/
