20 Lokalità F’Malta Joffru Servizz Ta’ Trasport Għall-Anzjani Biex Jagħmlu L-Qadi Tagħhom
Is-servizz tas-Silver-T, li huwa servizz li jipprovdi trasport b’xejn lill-anzjani ’l fuq minn 60 sena u li għandhom bżonn assistenza fil-qadi tagħhom fl-istess lokalità, se jkun estiż.
Il-Ministru għall-Anzjani u l-Anzjanità Attiva Michael Farrugia ħabbar waqt konferenza tal-aħbarijiet li dan is-servizz se jkun qed jiġi estiż biex ikopri wkoll il-lokalità ta’ San Pawl il-Baħar, li hija l-20 lokaltità li se tkun qed toffri dan is-servizz. Is-servizz jinkludi l-inħawi tal-Qawra, Buġibba u x-Xemxija.
“Permezz ta’ din il-miżura, se nkunu wettaqna 90 fil-mija tal-mizuri mressqin fil-budget għal din is-sena u fil-ġimgħat li ġejjin, se nkunu qed inwettqu l-aħħar miżura, biex il-Ministeru jkun wettaq il-mizuri kollha li kellu jwettaq,” ħabbar il-Ministru Farrugia.
Il-Ministru Michael Farrugia qal li d-Dipartiment għall-Anzjanità Attiva u Kura fil-Komunità jirċievi iżjed minn 700 telefonata fix-xahar biex l-anzjani jibbenifikaw minn dan it-trasport fil-lokalitajiet rispettivi.
“Barra minn hekk, id-Dipartiment qed jaħdem biex jestendi s-servizz fuq bażi nazzjonali,” qal il-Ministru Michael Farrugia.
Dan is-servizz jopera mit-Tnejn sal-Ġimgħa, mis-7.00am sas-2.00pm u jipprovdi faċilità ta’ trasport lil dawk il-persuni anzjani li jixtiequ jmorru postijiet bħall-bank, is-suq, il-klinika, il-kunsill lokali u diversi postijiet oħra li jeħtieġ il-klijent mid-dar tiegħu għal postijiet oħra fl-istess lokalità.
Ritratt: DOI
