Ħadmet Għal 8 Xhur Bħala Tabiba Mingħajr Awtorizzazzjoni

Mara tinsab taħt investigazzjoni fl-Awstralja wara li allegatament ħadmet ta’ tabiba mingħajr awtorizzazzjoni.

Huwa rapportat li l-mara ta’ 27 sena ħadmet għal 8 xhur fl-Isptar Bankstown-Lidcombe f’Sydney. Sakemm l-amministrazzjoni skoprew li ma kienitx irreġistrata mal-Australian Health Practitioner Regulation Agency (AHPRA), li takkredita lill-istaff mediku fil-pajjiż.

Kelliema għall-Isptar qalet fi stqarrija li l-impjegata li bdiet taħdem f’Jannar ta’ din is-sena “tneħħiet immedjatament minn xogħolha” meta l-awtoritajiet skoprew li ma kienitx akkreditata bħala tabiba. Żiedet tgħid li din il-persuna kienet “dejjem sorveljata” matul il-ħin kollu li kienet taħdem fl-isptar.

Skond rapporti fl-aħbarijiet Awstraljani ġie rapportat ukoll li din il-mara li għamlitha ta’ tabiba falliet l-eżamijiet tagħha u għamlet ċertifikati foloz sabiex tidħol taħdem bħala tabiba.

Kemm l- AHPRA u anke l-Pulizija ta’ New South Wales qed jinvestigaw dan il-każ.

Ritratt: BBC