Raġel Ta’ 58 Sena B’Ġrieħi Gravi Wara Li Waqa’ Minn Fuq Scaffolding
Raġel ta’ 58 sena sofra ġrieħi gravi wara li waqa’ minn għoli fi Triq Dun Xard, Ħad-Dingli.
L-inċident seħħ ilbieraħ filgħaxija, għall-ħabta tas-6:30pm. Il-Pulizija tad-Distrett marret minnufih fuq il-post u minn stħarriġ li sar irriżulta li raġel residenti Ħad-Dingli kien waqa’ minn fuq scaffolding.
Tim mediku ta l-għajnuna lir-raġel li ttieħed l-Isptar Mater Dei permezz t’ambulanza.
L-investigazzjonijiet tal-Pulizija għadhom għaddejjin.
