Iffirmat Ftehim Ta’ €300,000 Għal Proġetti Ambjentali Fi 11-il Żona Urbana
Dalgħodu tħabbar kif Ambjent Malta ħa tkun qed tinvesti ‘l fuq minn €300,000 għal proġetti ta’ tħaddir urban f’diversi lokalitajiet f’Malta u f’Għawdex.
Dan tħabbar mill-Ministru għall-Ambjent, it-Tibdil fil-Klima u l-Ippjanar Aaron Farrugia waqt ċerimonja ta’ ffirmar ta’ ftehimiet għal proġetti ta’ tħaddir urban ma’ 11-il kunsill lokali.
“Dawn il-proġetti ekoloġiċi, fil-qalba tal-komunitajiet tagħna, għandhom diversi benefiċċji li jvarjaw minn titjib fil-benesseri ġenerali, estetika aħjar u benefiċċji ambjentali. Dawn il-proġetti qed jagħtu lura spazji ħodor miftuħa lill-komunitajiet, li se jservu bħala post fejn iċ-ċittadini jkunu jistgħu jgawdu l-familji tagħhom, u b’hekk itejbu l-kwalità tal-ħajja”, qal il-ministru.
“L-entitajiet kollha tal-gvern, b’mod partikolari l-entitajiet fi ħdan il-Ministeru – minn Ambjent Malta sal-Awtorità tal-Ippjanar – jeħtieġ li jħaddnu iktar il-kunċett ta’ tħaddir f’kull proġett, minn binjiet kbar sa proġetti tal-kunsilli lokali. In-nies, kif ukoll il-gvern, iridu jaraw proġetti iktar ħodor, iktar ambjentali u iktar sostenibbli fl-urban. B’hekk, l-awtoritajiet iridu jinsistu u jobbligaw it-tħaddir u jaraw li l-proġetti li jiffinanzjaw ikunu tabilħaqq proġetti ħodor, li jkun estetikament sbieħ u li jagħmlu ġid għall-ambjent tagħna”, qal il-Ministru Farrugia.
Il-Ministru stqarr li proġetti bħal dawn itejbu l-valur tal-komunità permezz ta’ benefiċċji estetiċi u ambjentali. Huwa temm jgħid li dawn l-ispazji ħodor miftuħa jżidu l-kapital tal-bijodiversità tagħna billi jistabbilixxu flora u fawna partikolari f’postijiet ġodda.
Il-Kunsilli Lokali li ħa jkunu qed jibbenefikaw minn dawn il-fondi huma:
Il-Kunsill Lokali ta’ Għajnsielem
Inħaddru Pjazza Tolfa
Il-Kunsill Lokali ta’ San Ġiljan
Tisbieħ Ġnien Saver Zarb
Il-Kunsill Lokali ta’ Santa Luċija
Spazji miftuħa f’Santa Luċija
Il-Kunsill Lokali tal-Ħamrun
Tisbiħ u manutenzjoni ta’ Pjazza San Pawl u Kappillan Muscat
Il-Kunsill Lokali tal-Belt Valletta
Tisbiħ Ġnien tal-Belvedere
Il-Kunsill Lokali ta’ San Lawrenz
Tisbiħ ta’ triq prinċipali li twassal għal pjazza
Il-Kunsill Lokali tal-Birgu
Tisbiħ ta’ Belvedere faċċata tal-Port il-Kbir
Il-Kunsill Lokali ta’ Birżebbuġa
Tisbiħ ta’ Pjazza San Ġorġ Preca u Xatt San Ġorġ
Il-Kunsill Lokali tal-Qala
Żona ta’ rikreazzjoni fi Triq Kunċissjoni
Il-Kunsill Lokali tal-Munxar
Tisbiħ tal-Pjazza
Il-Kunsill Lokali ta’ Tas-Sliema
Tisbiħ ta’ Triq Prinċipali Bisazza
