7 Plejers Maltin Ħadu Sehem Fil-European Snooker Championships 2021 Ġewwa L-Portugal

Kontinġent ta` 7 plejers immexxija mill-President tal-Malta Billiards and Snooker Association Ivan Brincat ħadu sehem fil-Kampjonati Ewropej ta` l-iSnooker li saru l-Portugal.

Bla dubju l-aħjar riżultat kisbuh il-koppja Duncan Bezzina u Philip Ciantar li fil-kompetizzjoni tat-timijiet kategorija Seniors waslu sal-finali.  Il-koppja Maltija rebħu l-grupp tagħhom biex fil-kwarti tal-finali rebħu kontra l-Ingilterra 4-1, wara rebħu s-semi-finali kontra l-Iskozja 4-0 però tilfu l-finali kontra l-Irlanda 5-3.

Fil-kompetizzjoni individwali Philip Ciantar ikkwalifika mal-aħħar 64  bħala t-tieni fil-grupp iżda wara ġie eliminat minn Ben Mertens tal-Belġju 4-1.

Aaron Busuttil kellu bidu eċċellenti u rebaħ il-grupp ta` kwalifikazzjoni però sfortunatament tilef kontra Ben Fortey ta Wales 4-1 fl-aħħar 64.

Brian Cini min-naħa tiegħu kiseb l-aħjar pożizzjoni.  Għalkemm ikkwalifika it-tieni fil-grupp tiegħu, fir-rawnd tal-aħħar 64 rebaħ kontra Declan Lavery tal-Irlanda ta` fuq. Fir-rawnd ta’ wara rebaħ kontra Brian Ochoiski ta` Franza 4-2, però meta wasal mal-aħħar 16 tilef kontra Shaun O’Sullivan tal-Ingilterra 4-1.

Chris Peplow u Joseph Casha ġew eliminati fil-fażi tal-gruppi.

Fil-kompetizzjoni Seniors, ‘l fuq minn 40 sena, Ivan Attard, Philip Ciantar u Duncan Bezzina ikklwalifikaw mil-fażi tal-gruppi.  Attard wara li rebaħ kontra l-Ġermaniż Frank Schroeder 3-1 ġie eliminat mill-Irlandiz Frank Sarsfield 4-2 fil-fażi tal-aħħar 16.

Ciantar u Bezzina kienu pass ‘l bogħod mis-semifinali. Ciantar rebaħ kontra l-Olandiż Joris Maas 3-2,  rebaħ kontra l-Iskoċċiz Lee Mcallister 4-3, però ġie eliminat mill-Ingliż David Brown 4-1. Duncan Bezzina rebaħ kontra Richard Emery tal-Ingilterra 3-2,  kontra l-Irlandiż Mark Tuite 4-3 però fil-kwarti finali tilef kontra l-Ingliż Wayne Brown 4-3 fejn fil-frame deċiżiv, il-logħba ġiet deċiża fuq black to win. Sfortunatament Bezzina ippotja l-boċċa s-sewda u mar telfa bil-boċċa l-bajda. B’hekk tilef il-logħba.

Fil-kompetizzjonijiet tat-timijiet kategorija Open, Team Malta 1 kompost minn Brian Cini u Aaaron Busuttil  rebħu l-grupp tagħhom però tilfu fil-kwarti finali kontra l-Belġju 4-2.