Il-Film Malti Luzzu Magħżul Biex Jikkompeti Fl-Oscars Tal-2022
Il-film Malti Luzzu għadu kemm ġie magħżul mill-Malta Academy Selection Committee biex jikkompeti fl-94 edizzjoni tal-Academy Awards.
Huwa ġie sottomess fil-kategorija tal-International Feature Film.
Il-film Luzzu s’issa diġà kiser kull rekord bħala l-ewwel film Malti li rebaħ għadd ta’ premjijiet prestiġjużi f’festivals internazzjonali, fosthom fil-festival ta’ Sundance.
Il-film jirrakkonta l-ħajja ta’ sajjied żagħżugħ Malti li bil-problemi kollha li kien qed jiffaċċja kien qed jipprova jgħajjex lill-martu u t-tarbija ta’ ftit xhur.
L-istorja tikkumplika ruħha hekk kif il-problemi fil-ħajja ta’ din il-familja żdiedu meta t-tarbija żviluppat diffikultajiet biex tkompli tiżviluppa fiżikament. Ix-xogħol ta’ sajjied ma kienx qed iħalli flus biżżejjed apparti l-problemi li kellu kawża ta’ ħsarat fid-dgħajsa. Il-pressjoni finanzjarja sfurzatu jdur għal triq differenti li trendi aktar flus però perikoluża.
Il-15-il finalist mistennija jitħabbru fil-21 ta’ Diċembru li ġej. Imbagħad fl-ewwel ġimgħa ta’ Frar jitħabbru l-aħħar ħames finalisti u r-rebbieħ jitħabbar fis-serata tal-Oscars, li se ssir fis-27 ta’ Marzu li ġej f’Los Angeles.
