Imnedija L-Politika Nazzjonali Tas-Suq Tax-Xogħol 2021-2030

Il-Ministru għall-Finanzi u x-Xogħol Clyde Caruana nieda l-politika nazzjonali tas-suq tax-xogħol għas-snin 2021-2030. Din il-politika hija mmirata sabiex toħloq livelli ta’ għajxien ogħla, kwalità ta’ ħajja aħjar bi dħul ogħla, u pagi aħjar, filwaqt li tgħammar lill-ħaddiema bl-għodda u l-ħiliet meħtieġa għall-futur. Il-politika hija bbażata fuq il-premessa li x-xogħol jagħti mhux biss dinjità, iżda wkoll sodisfazzjon.

“Malta tinsab f’punt ta’ bidla. Dan id-dokument ta’ politika jintroduċi bidla kemm fil-mod kif inħarsu lejn ix-xogħol kif ukoll fil-produttività f’Malta. Diġà ksibna ħafna matul dawn l-aħħar snin fir-rigward tax-xogħol f’pajjiżna, hekk kif iċ-ċifri lokali juru livell baxx ta’ qgħad, wasal iż-żmien li ngħollu l-livell u ngħollu l-valur ta’ dak li nipproduċu. Mhuwiex kompitu faċli. L-innovazzjoni titlob li nkomplu ntejbu u nbiddlu n-negozji u l-ħaddiema tagħna. Jekk nonqsu li nagħmlu dan, ikun hemm konsegwenzi. Hekk kif irbaħna sfidi diffiċli fil-passat, irridu nkomplu nagħmlu hekk illum u għada.”

Fit-tfassil tal-politika nazzjonali l-ġdida dwar tax-xogħol, pass fundamentali kien li jiġi mifhum il-kuntest fundamentali ekonomiku tal-gżira u l-iżvilupp tiegħu matul l-aħħar ftit snin. Sar eżerċizzju ta’ konsultazzjoni wiesa’ ma’ numru ta’ stakeholders ewlenin. B’mod ġenerali, saru 30 focus group f’diversi setturi tal-industrija, b’268 persuna fin-negozju. Biex titkejjel il-perċezzjonijiet ta’ ħaddiema individwali, sar ukoll studju rappreżentattiv ta’ 4000 individwu mill-Uffiċċju Nazzjonali tal-Istatistika.

Filwaqt li jenfasizza r-realtajiet ekonomiċi tal-ekonomija ta’ Malta, id-dokument ibassar ukoll il-muturi ewlenin tal-bidla li huma mistennija li jmexxu l-ekonomija globali u jħallu impatt fuq id-dinja tax-xogħol, kif ukoll il-perċezzjonijiet lokali tal-ħaddiema Maltin lejn id-dinja tax-xogħol tagħhom stess ibbażata fuq id-dħul, il-karriera u l-ħiliet. Dan jagħmel il-politika tax-xogħol mfassla skont il-kuntest partikolari, il-potenzjal, l-isfidi, u l-opportunitajiet ta’ pajjiżna.

Mill-analiżi, jidher li d-distakk fil-ħiliet li qed jiġi esperjenzat f’Malta huwa mistenni li jkompli u se jkun kritiku għall-kompetittività ta’ Malta biex tiżviluppa suq tax-xogħol tas-sengħa b’mod ġenerali. Fl-istess ħin, l-isforzi biex jintlaħaq bilanċ bejn riżorsi lokali mħarrġa sew u sistema flessibbli li tittratta n-nuqqas ta’ ħaddiema u tamministra l-ħaddiema migranti għandhom ikomplu.

Konxju mill-isfidi u l-opportunitajiet li qed jiffaċċja s-suq tax-xogħol ta’ Malta, il-Gvern qed jippreżenta 40 rakkomandazzjoni bbażati fuq tliet prinċipji gwida, li huma:

• Tħarriġ ta’ individwi biex jakkwistaw il-ħiliet meħtieġa u mitluba mill-industrija għad-dinja ta’ għada u jagħtu s-setgħa lill-ħaddiema kollha biex jipparteċipaw b’mod attiv fis-suq tax-xogħol ta’ Malta u biex jiżguraw li jkunu jistgħu jiksbu livell ta’ għejxien ogħla permezz tal-impjieg.
• Li tippermetti lil min iħaddem u lin-negozji biex ikomplu jinvestu fit-tkabbir tan-negozju u l-impjiegi.
• Tfassil ta’ istituzzjonijiet ta’ xogħlijiet li jirrispondu u li jġibu l-istess kundizzjonijiet għall-ħaddiema kollha biex jaħdmu b’dinjità.

Il-Gvern jemmen li din il-politika se tkun il-futur tax-xogħol u se tiftaħ il-potenzjal għal mobbiltà soċjali reali għall-familji Maltin, biex igawdu impjieg ta’ kwalità aħjar u livell ta’ għajxien ogħla. Il-Ministru Caruana semma kif din il-viżjoni ser tkompli tissaħħaħ b’miżuri fil-Baġit tal-ġimgħa d-dieħla għas-sena 2022.