Żewġ Toroq Fl-Għarb Ġew Irranġati Mill-Ġdid B’Investiment Ta’ €370,000
Żewġ toroq f’Għawdex, Triq Birbuba u Triq ta’ Sdieri fl-Għarb ġew irranġati u ngħataw it-tarmak mill-ġdid b’investiment ta’ aktar minn €370,000.
Fi stqarrija mill-Ministeru għal Għawdex ġie spjegat kif wara li nbidlu s-servizzi fi Triq Birbuba, l-Għarb, li fiha 2,190 metru kwadru, ġiet irranġata u ngħatat it-tarmak b’valur ta’ €206,113. Min-naħa l-oħra, Triq ta’ Sdieri tħammlet sal-blat, inbena walk-in culvert għas-servizz tad-dawl u reġa’ ġie mgħoddi s-servizz tad-drenaġġ u tal-main tal-ilma. Barra minn hekk, inbnew mill-ġdid il-ħitan tal-ġnub tat-triq. It-triq bi 302.4 metri kwadri ngħatat it-tarmak u tlestiet b’valur ta’ €165,200.
Il-Ministeru għal Għawdex qal li din is-sena kompla bi programm ambizzjuż bl-investimenti fl-infrastruttura, ir-riġenerazzjoni ta’ pjazez u bajjiet, titjib tal-faċilitajiet, u mmodernizzar fl-infrastruttura rurali u residenzjali.
Il-Ministru għal Għawdex Clint Camilleri tenna li l-kostruzzjoni u t-titjib tat-toroq f’Għawdex se tibqa’ prijorità bil-fatti. F’dak li għandu x’jaqsam ma’ proġetti ta’ bini ta’ toroq arterjali u residenzjali f’Għawdex, din is-sena biss sa Settembru 2021 tlestew madwar 34,000 metru kwadru ta’ toroq ġodda. Huwa fakkar kif fil-Baġit għall-2022 ġew allokati €11-il miljun għall-kostruzzjoni u t-titjib tat-toroq.
Ritratti: MGOZ
