Il-President Ta’ Malta Jippreżenta L-Premjijiet Tal-‘Malta Businesswoman Of The Year Awards’
Il-‘Malta Businesswoman of the Year Awards’ huma okkażjoni eċċellenti biex jiġi rikonoxxut l-irwol importanti ħafna li għandhom l-imprendituri nisa fl-ekonomija u l-komunità tagħna, filwaqt li jkunu ta’ eżempju għal ħaddieħor. Dan qalu l-President ta’ Malta George Vella matul iċ-ċerimonja tal-‘Malta Businesswoman of the Year Awards’ li saret il-Casino Maltese.
HSBC Bank Malta nediet il-‘Malta Businesswoman of the Year Awards’ fl-2018 sabiex tgħin tippromwovi u tirrikonoxxi l-eċċellenza tan-nisa li kisbu suċċess sinifikanti fin-negozju.
Il-President faħħar lill-imprendituri nisa kollha f’Malta, inklużi dawk li ma kinux nominati u dawk barranin f’Malta, talli affaċċjaw sfidi mingħajr preċedent matul pandemija qalila li affettwat is-sitwazzjoni tal-impjiegi tan-nisa madwar id-dinja.
Fid-diskors tiegħu, il-President spjega li minħabba l-COVID-19, iċ-ċifri ta’ qgħad tan-nisa żdiedu b’mod drastiku meta mqabbla ma’ tal-irġiel, u dan kompla jkabbar id-differenza bejn il-ġeneri fejn jidħol il-faqar. Dan kien riżultat ukoll taż-żieda fir-responsabbiltajiet ta’ kura fil-familja, it-tnaqqis fl-aċċess għal mezzi diġitali, kif ukoll id-diversi livelli ta’ kwistjonijiet ta’ saħħa mentali, fost fatturi oħra. Fuq kollox, huwa ħeġġeġ biex iktar kumpaniji jintroduċu miżuri favur il-familja bħal “xogħol mid-dar jew ħinijiet flessibbli ta’ xogħol li jippermettu lin-nisa jilħqu bilanċ bejn ir-responsabbiltajiet tax-xogħol u tad-dar” u biex jinstabu soluzzjonijiet prattiċi li jippromwovu bilanċ bejn il-ġeneri u opportunitajiet indaqs matul u wara l-pandemija.
Simon Vaughan Johnson, il-Kap Eżekuttiv ta’ HSBC Bank Malta, qal li n-nominati ta’ din is-sena wrew li l-komunità Maltija hija għanja bi stejjer ta’ nisa li kellhom suċċess u jittama li jkun hemm iktar nisa li jiġu ispirati mir-rebbieħa ta’ din iċ-ċerimonja. Is-Sur Vaughan Johnson għalaq billi ppreżenta Trofew ta’ Tifkira lill-President bħala ġest ta’ apprezzament.
