Approvat Il-Bini Ta’ Ċentru Nazzjonali Tal-Futbol F’Ta’ Qali

Applikazzjoni li tressqet mill-Malta FA għall-bini ta’ Ċentru Nazzjonali tal-Futbol ġiet approvata llum waranofsinhar mill-awtorità relatata. Dan il-proġett jikkonsisti fil-bini ta’ sett ta’ faċilitajiet li jkunu d-dar tat-Timijiet Nazzjonali tal-Futbol ta’ Malta, mill-etajiet bikrija ‘il quddiem.

Se jkun fiha wkoll l-aħħar teknoloġija fil-laboratorji ta’ riċerka fix-xjenza tal-isport, faċilitajiet mediċi, klinika tal-fiżjoterapija, ġinnasju, dressing rooms, faċilitajiet ta’ catering, kmamar ta’ laqgħat u lectures b’funzjonijiet diversi, kamra ta’ rilassament u uffiċċji tekniċi f’konformità mal-Gwida tal-Aħjar Prattika tal-UEFA għall-Kostruzzjoni taċ-Ċentru tat-Taħriġ.  Iċ-ċentru ġie ddisinjat bil-ħarsien tal-ambjent u s-sostenibbiltà li ttieħdu in konsiderazzjoni.

Dan l-investiment se jipprovdi faċilità ta’ prattika mill-aktar avvanzata li tinkludi stadium ta’ Kategorija 1 għall-użu domestiku, internazzjonali u għal turiżmu sportiv. Se torganizza wkoll logħbiet internazzjonali bħall-Finali tal-Kampjonat tal-UEFA U19 fis-sajf tal-2023. Il-Malta FA ssieħbet mal-Fond Nazzjonali għall-Iżvilupp u Soċjali għall-finanzjament ta’ dan il-proġett.