Il-Ministru Evarist Bartolo F’Kuntatt Mal-Konsulent Speċjali Tas-Segretarju Ġenerali Tan-Nazzjonijiet Magħquda Dwar Il-Libja
Il-Ministru għall-Affarijiet Barranin u Ewropej Evarist Bartolo illum tkellem bit-telefon dwar is-sitwazzjoni fil-Libja ma’ Stephanie Williams, il-Konsulent Speċjali dwar il-Libja tas-Segretarju Ġenerali tan-Nazzjonijiet Uniti.
Il-Ministru Bartolo wassal lis-Sinjura Williams ir-rieda tal-Prim Ministru Robert Abela biex Malta tappoġġja l-ħidma tan-Nazzjonijiet Magħquda fil-promozzjoni ta’ djalogu inklużiv fil-Libja u fil-mobilizzazzjoni ta’ appoġġ reġjonali u internazzjonali biex tinstab bażi komuni għall-ġid komuni tal-poplu Libjan kollu.
Il-Ministru Bartolo qal lis-Sinjura Williams li jinħtieġu passi ġodda biex jappoġġjaw l-iżvilupp politiku, soċjali u ekonomiku tal-poplu Libjan biex jerġa’ jieħu l-kontroll tad-destin tiegħu stess, itemm il-firdiet interni, jibni istituzzjonijiet nazzjonali u inklużivi għall-ġid ta’ kulħadd.
Il-Ministru Bartolo qal ukoll lis-Sinjura Williams li l-Unjoni Afrikana u l-ġirien tal-Libja jeħtieġ ikunu involuti meta jittrattaw l-irtirar ta’ merċenarji barranin peress li pajjiżi bħas-Sudan u ċ-Ċad ikunu destabilizzati jekk din il-kwistjoni delikata ma tiġix ittrattata tajjeb.
Il-Ministru Bartolo saħaq dwar l-importanza li kemm jista’ jkun Libjani ikunu inklużi u kkonsultati fil-proċess politiku biex jiġi żgurat li l-eżitu tal-elezzjonijiet ikun aċċettat u rispettat minn kulħadd ladarba dawn isiru.
