€65,000 Miġbura Mill-Pubbliku Biex Ikunu Appoġġati Għaqdiet Li Jaħdmu Fil-Qasam Tal-Kanċer
Lejliet il-Jum Dinji tal-Kanċer, it-tim tal-Kampanja Pink October Movember ippreżenta l-fondi miġbura matul il-kampanja edukattiva li saret f’Ottubru 2021. Minkejja l-fatt li minħabba l-pandemija tal-Covid-19 ma sarux attivitajiet ta’ ġbir ta’ fondi il-pubbliku ġenerali xorta ġabar is-somma sabiħa ta’ €65,000.
Il-fondi dalgħodu ngħataw lil NGOs relatati mal-kanċer li jappoġġjaw b’modi differenti l-pazjenti u l-familji li jgħaddu minn trawma tal-kanċer. Parti mill-fondi se jmorru wkoll għall-kampanja edukattiva tal-2022 u lejn l-akkwist ta’ tagħmir li għandu jintuża mill-kirurgi fl-Isptar tal-Onkologija, Sir Anthony Mamo.
Dr. Danika Marmara, Direttur tad-Direttorat Cancer Care Pathways enfasizzat l-importanza ta’ kampanji edukattivi bħal dawn li jagħmlu lill-pubbliku aktar konxju u appoġġat aħjar u tħeġġeġ il-kontinwazzjoni ta’ dawn il-kampanji nazzjonali li qed jedukaw lill-pubbliku.
Is-Sinjura Michelle Muscat, Chairperson tal-Fondazzjoni Marigold li tikkordina din il-kampanja, irringrazzjat lill-konsulenti tal-onkoloġija, tobba, infermiera, professjonisti tas-saħħa, pazjenti, voluntiera u sponsors talli bix-xogħol volontarju tagħhom jagħmlu din il-kampanja suċċess.
Is-Sinjura Muscat sostniet li l-messaġġ tal-kampanja għandu jibqa’ jgħodd matul is-sena kollha fejn wieħed m’għandux jibża’ jiċċekkja lilu nnifsu b’mod regolari u kemm jista’ jkun jgħix ħajja b’saħħitha.
Europa Donna Malta, Action for Breast Cancer, Hospice Malta, Puttinu Cares, Karl Vella Foundation, Smiling with Jerome Foundation u Movember Europe ġew ippreżentati kollha bid-donazzjonijiet.
