Illum Ser Jitressqu L-Ħamest Irġiel Arrestati B’Rabta Ma’ Traffikar U Pussess Tad-Droga F’Għawdex

Illum, għall-ħabta tat-tlieta ta’ wara nofsinhar, il-Pulizija ser tressaq xi persuni l-Qorti t’Għawdex, akkużati bi traffikar ta’ droga quddiem il-Maġistrat tal-Għassa Dr Bridgette Sultana.

Il-Ħamest irġiel ġew arrestati mill-Pulizija mill-Iskwadra ta’ Kontra d-Droga b’rabta ma’ investigazzjonijiet dwar traffikar u pussess ta’ droga f’Għawdex.

Wara jiem ta’ osservazzjoni f’diversi postijiet, il-Pulizija għamlu tfittxijiet fi stabbiliment f’Għajnsielem u fil-pussess ta’ tlitt irġiel ta’ 59, 30 u 22 sena nstabet sustanza suspettata kokaina.

Tfittxijiet oħra saru fix-Xagħra, fejn il-Pulizija bdiet issegwi vettura li fiha kien hemm żewġt irġiel ta’ 20 u 21 sena. Wara li twaqqfu, saret tfittxija u fil-pussess tagħhom instabet sustanza suspettata kannabis
lesta għat-traffikar.

L-irġiel ittieħdu fil-lock-up tal-Pulizija fil-Furjana fejn qegħdin jinżammu għal aktar stħarriġ u mistennija jitressqu l-Qorti fil-jiem li ġejjin.

Il-Maġistrat tal-Għassa Dr Bridgette Sultana ġiet infurmata u ħatret inkjesta filwaqt li l-Pulizija għaddejja bl-investigazzjonijiet.