Siegħat Qabel Il-Finali Tal-MESC Aidan Mistieden Fi Spanja Biex Ikanta ‘Ritmu’ F’Eurovison Party
Wara li lbieraħ tħabbru l-finalisti tal-Malta Eurovision Song Contest bosta siti madwar l-Ewropa fosthom Wiwibloggs, Eurovisionworld u Escxtra tkellmu dwar dan, kif ukoll esprimew il-ħsibijiet tagħhom, bil-kantanti Aidan, Emma Muscat u Nicole Azzopardi fost il-favoriti.
Jidher li l-kanzunetta ta’ Aidan, ‘Ritmu’ mhux biss qed tmur tajjeb f’Malta iżda wkoll fi Spanja fejn il-ħoss mużikali tagħha tipiku Spanjol qed iħalli mpatt fuq is-segwaċi ta’ dan il-festival.
Filmati fuq il-mezzi soċjali juru li din id-diska fil-fatt apparti l-verżjoni bil-Malti ġiet irrekordjata verżjoni oħra bl-Ispanjol li diġà qed tindaqq fi Spanja u sejra tajjeb ħafna.
So much love from the Spanish eurofans! 🇪🇦❤️ To thank you I want to share a small part from the Spanish version of #RITMU, my song for Malta #Eurovision 2022 final tonight! 🤠 ¡Gracias! Wish me luck!🤞🏻#MESC2022 https://t.co/qUlRuWRV1Q pic.twitter.com/x3FLuHzG5X
— AIDAN 🇲🇹 (@AIDANOfficial__) February 19, 2022
Sorsi tagħna li huma midħla ta’ dan l-ikbar Festival fl-Ewropa qalulna li ftit tas-siegħat ilu Aidan ġie mistieden fi Spanja sabiex ikanta din il-kanzunetta fil-preparty tal-Eurovision li jsir ta’ kull sena lejn l-aħħar ta’ Marzu.
L-organizzaturi qalu li jkun xi jkun irriżultat tal-lejla ‘Ritmu’ se tkun inkluża f’dan l-avveniment.
Naturalment l-istennija issa hija għal-lejla sabiex naraw is-17-il kanzunetta finalista u finalment naraw min ħa jkun il-kantant/a li se jkun qed jirrappreżenta lil Malta fis-66 edizzjoni tal-Eurovision Song Contest fil-belt Taljana ta’ Turin.
Il-finali tal-Malta Eurovision Song Contest tixxandar illejla b’mod dirett fuq TVM fid-9pm.
