“Bżonn Ta’ Azzjoni Mmedjata Għall-Pazjenti Li Qed Jistennew Operazzjoni Urġenti Fl-Ortopedija” – Il-PN
“Hemm bżonn tiġi indirizzata b’ mod immedjat sitwazzjoni li tirrigwarda l-operazzjonijiet ta’ emerġenza fl-Ortopedija.”
Dan qalu l-Kelliem tal-Partit Nazzjonalista għas-Saħħa, Stephen Spiteri, fejn fi stqarrija saħaq li ħafna pazjenti qed isofru minn dewmien inaċċettabli meta l-kundizzjoni medika tagħhom tirrikjedi kirurġija urġenti.
“Dan id-dewmien jista’ jwassal għal kumplikazzjonijiet fuq saħħet dawn l-individwi wħud minnhom anzjani u vulnerabbli,” tenna Spiteri, filwaqt li sostna li n-nuqqas ta’ operating tables, anestetisti u theater nurses huma fatturi li qed iwasslu għal dan.
“Din sitwazzjoni trid tiġi evitata b’soluzzjonijiet evidenti,” saħaq il-Kelliem tal-PN.
Il-Partit Nazzjonalista ilu jisħaq fuq waiting lists u żmien ta’ stennija eseġerat fil-qasam ta’ kura u servizz fl-Isptar Meter Dei li qed inaqqas il-kwalità u l-effiċjenza. “Il-pazjenti Maltin u Għawdxin u l-familjari tagħhom jistħoqilhom aħjar,” temm jgħid il-PN.
