Mireya Cassar Tirbaħ L-Atlas Atleta Żagħżugħa Tax-Xahar Għal April
Mireya Cassar ingħatat l-unur tal-Atlas Atleta Żagħżugħ tax-Xahar għal April.
Ta’ 19-il sena, Mireya Cassar mhux biss kisret ir-rekord nazzjonali tal-hammer throw għal tliet darbiet waqt l-istess kompetizzjoni, iżda saħansitra qabżet il-50 metru, b’tefa’ proprju ta’ 52.50 metru. Cassar kisbet dan ir-riżultat waqt it-tieni Challenge Meeting organizzat minn Athletics Malta fit-trakka tal-Matthew Micallef St John Stadium fil-Marsa.
B’dan ir-riżultat, Cassar, kisret ir-rekord nazzjonali fl-erba’ kompetizzjonijiet li ħadet sehem fihom din is-sena, inkluż tlieta barra minn xtutna, fejn b’kollox irnexxielha ttejjeb ir-rekord b’aktar minn 5 metri. Fl-istess kompetizzjoni Cassar rreġistrat ukoll rekord ta’ taħt l-20 sena fix-shot put.
Dan ir-riżultat ikompli jawgura tajjeb għal Cassar fl-iżvilupp atletiku tagħha. Cassar mistennija tkun waħda mill-atleti li tirrappreżenta lill-pajjiżna fil-Kampjonati tal-Atletika tal-Pajjiżi ż-Żgħar li se jsiru proprju f’pajjiżna f’Ġunju li ġej.
Mireya Cassar bħalissa qed titħarreġ b’mod professjonali fil-Ġermanja, għaldaqstant il-preżentazzjoni uffiċjali tat-trofew Atlas Atleta Żagħżugħa tax-Xahar u l-vawċer ta’ abbiljament sportiv abbinat ma’ dan il-premju se jingħathulha aktar ‘il quddiem.
Dan il-premju ta’ kull xahar jingħata b’inizjattiva konġunta tal-Għaqda Ġurnalisti Sports flimkien ma’ Atlas Insurance. Il-panel li jiġġudika r-rebbieħa ta’ dan il-premju jieħu nota tas-suċċessi miksuba matul dak ix-xahar u fl-istess ħin jistieden lill-assoċjazzjonijiet u federazzjonijiet sportivi sabiex jibgħatu n-nomini tagħhom. In-nominati li jiġu evalwati jridu jkunu taħt il-21 sena.
