Jinħarġu Akkużi Fil-Konfront Ta’ Żewġ Uffiċjali Tal-Pulizija
Din l-Istqarrija Stampa qiegħda tiġi kkomunikata bħala aġġornament għall-Istqarrija Stampa PR 349/20 (ara isfel) maħruġa fl-24 ta’ Ġunju, 2020.
Wara li ġew konklużi l-Inkjesta Maġisterjali u l-investigazzjonijiet b’rabta ma’ dan il-każ, żewġ uffiċjali tal-Pulizija ġew sospiżi u nħarġu akkużi kriminali fil-konfront tagħhom, permezz ta’ ċitazzjoni.
Il-kawża se tibda tinstema’ fil-jiem illi ġejjin quddiem il-Maġistrat Dr Doreen Clarke.
F’dan l-istadju, ma jkunx prudenti li l-Korp tal-Pulizija jagħti iżjed kummenti dwar dan il-każ u dan sabiex ma jippreġudikax il-kors tal-ġustizzja.
L-istqarrija msemmija
Illum, għall-ħabta tal-erbgħa nieqes għoxrin ta’ filgħodu, (0340hrs), il-Pulizija stazzjonati fil-Lock-Up tal-Kwartieri Ġenerali tal-Pulizija, il-Floriana, innutaw li persuna li kienet qed tinżamm hemmhekk kellu bżonn l-assistenza medika, peress li prima facie deher li kien qiegħed ibati minn ‘fit’.
Minnufih bdiet tingħata l-assistenza medika u anke intużat AED, filwaqt li ssejjaħ tim mediku fuq il-post. Mal-wasla tat-tim mediku, dawn komplew jassistu lil din il-persuna,
iżda minkejja kull tentattiv, ir-raġel ta’ 35 sena residenti l-Imtarfa, sfortunatament tilef ħajtu.
Ir-raġel kien twaqqaf aktar kmieni għall-ħabta tan-nofssiegħa ta’ filgħodu (0030hrs), minn żewġ units tar-Rapid Intervention Unit (RIU) li kienu fuq ronda u wara li qajmilhom suspett u waqfuh, saritlu tfittxija fejn instab fil-pussess ta’ sustanza allegatament droga.
Bil-każ ġiet infurmata l-Maġistrat tal-Għassa Dr. Josette Demicoli li ħatret diversi esperti sabiex jassistuha fl-inkjesta.
L-investigazzjonijiet tal-Pulizija dwar dan għadhom għaddejjin.
