Festival tal-Mużika 80s U 90s Se Jagħti Sapport Lil Inspire Foundation Malta
Inspire Foundation Malta qed tingħaqad ma’ K Music Events għall-ħames edizzjoni tal-‘80s and 90s Music Festival’ li se jkun qed iseħħ fid-29 ta’ Lulju 2022 fit-8pm f’Ħal Kirkop.
Filwaqt li l-avveniment huwa b’xejn, se jkunu qed jinġabru donazzjonijiet mad-dħul li se jkunu qed imorru għal Inspire Malta.
Il-kunċert se jkun qed jospita imitatriċi professjonali tal-kantanta Tina Turner u wħud mill-aqwa DJs lokali: Alex Reflex Grech, Sue Mifsud u Renato Vella. L-aħħar edizzjoni saret qabel il-bidu tal-pandemija tal-Covid-19 f’Malta fejn bosta persuni ta’ kull età attendew bi ħġarhom.
Il-Kap Eżekuttiv ta’ Inspire Malta, Antonello Gauci, qal li din il-kollaborazzjoni hija mod ieħor kif Inspire Foundation iżżomm lilha nnifisha preżenti fil-komunità. “Il-Fondazzjoni tagħna taħdem biex tpoġġi l-inklużjoni fiċ-ċentru ta’ dak kollu li tagħmel f’kull settur tas-soċjetà. Ninsabu kuntenti li organizzazzjonijiet bħal K Music Events jaraw ix-xogħol ta’ Inspire Malta bħala wieħed importanti u għażluna bħala l-organizzazzjoni benefiċjarja ta’ dan il-festival mużikali annwali. Il-ġenerożità tagħhom hija apprezzata u se tkun qed tgħinha nkomplu nipprovdu servizzi li joħolqu differenza fil-ħajja ta’ persuni b’diżabilità kuljum.”
Is-Sur Gauci rringrazzja lil K Music Events, l-organizzaturi tal-avveniment u xtaqilhom festival mill-aqwa. Is-Sur Louis Zammit, il-President tal-Ghaqda Muzikali San Leonardu li huma l-organizzaturi tal-festival esprima ukoll l-entużjażmu tagħhom biex jikkontribwixxu għal kawża importanti. “Bħala organizzazzjoni volontarja, K Music Events tinsab kuntenta li qed torganizza avveniment b’risq kawża daqshekk tajba.
Dawn l-avvenimenti jgħinuna nkomplu nikbru fil-komunità filwaqt li bihom ngħinu wkoll lil persuni oħra li għandhom bżonn l-assistenza.”
Għal aktar informazzjoni, żur https://www.facebook.com/The8090MusicFestival
Ritratt: Il-ħames edizzjoni tal-‘80s and 90s Music Festival’ se tkun qed issir nhar id-29 ta’ Lulju, 2022
