Malti Ta’ 64 Sena Arrestat Fl-Ajruport B’Rabta Ma’ Importazzjoni Ta’ Eroina
Malti ta’ 64 sena ġie arrestat wara investigazzjoni mill-Pulizija tal-Iskwadra ta’ Kontra d-Droga b’rabta ma’ traffikar u importazzjoni tad-droga. Huwa ġie arrestat tard nhar l-Erbgħa filgħaxija fl-Ajruport Internazzjonali ta’ Malta wara li fil-pussess tiegħu nstabu madwar tliet kilos ta’ sustanza suspettata droga eroina.
Ir-raġel, li huwa residenti Bormla, twaqqaf mill-Pulizija hekk kif wasal Malta b’titjira minn Brussell, il-Belġju, wara informazzjoni li kien qiegħed iġorr sustanza llegali fil-bagalja. Wara li ntalbet l-assistenza tat-taqsima tal-klieb tad-Dwana, is-suspett kiber hekk kif il-kelb beda jindika xi ħaġa suspettuża fl-istess bagalja.
Il-Pulizija għalhekk fetħu l-bagalja u f’qiegħ falz instab pakkett kbir li fih kien hemm id-droga, b’valur fit-triq ta’ madwar €600,000.
Il-Maġistrat tal-Għassa Dr Marsanne Farrugia ġiet infurmata bis-sejba u ħatret inkjesta.
Ir-raġel qiegħed jinżamm arrestat fil-lock-up tal-Pulizija fil-Kwartieri Ġenerali, il-Floriana u mistenni jitressaq il-Qorti aktar tard illum, għall-ħabta tal-ħdax u kwart ta’ filgħodu quddiem il-Maġistrat tal-Għassa Dr Nadine Lia.
