L-Arti Performattiva Waqt In-Notte Bianca!
Is-Sibt li ġej il-Belt Kapitali ser tinbidel f’ċentru kulturali fejn diversi artisti kemm lokali kif ukoll internazzjonali ser jingħaqdu f’lejl wieħed – In-Notte Bianca!
Din is-sena l-programm tan-Notte Bianca ser jinkludi diversi rotot li jinkludu prestazzjonijiet taż-żfin mużikali, teatrali, mużika klassika u dik alternattiva, attivitajiet għat-tfal u attivitajiet għal udjenza aktar matura. Il-maġġoranza tal-attivitajiet jinkludu prestazzjonijiet mużikali ta’ kull ġeneru, bħal country, blues, rock, mużika klassika, pop u ħafna aktar. Madanakollu, l-arti performattiva xorta waħda ser tieħu prijorità permezz ta’ diversi attivitajiet multi-dixxiplinari madwar il-Belt.
Fost waħda mir-rotot tal-programm ta’ din is-sena ser insibu dik taż-żfin, li ser tinkludi ġeneri differenti li jvarjaw minn flamenco, żfin tradizzjonali, kontemporanju u ħafna aktar. Fost dawn l-attivitajiet ser naraw il-prestazzjoni UNight, fejn bosta artisti lokali u internazzjonali ser jingħaqdu għal ċelebrazzjoni kbira ta’ għaqda fid-diversità b’wirja ta’ kuluri, moda, żfin u arti ġewwa l-Mużew tal-Archaeoloġija fit-8pm, fid-9pm u fl-10pm. Isimgħu minna, din il-prestazzjoni mhux ta’ min titlfuha!
Jekk wieħed iżur ir-rotta tat-teatru, jista’ jgawdi diversi prestazzjonijiet komiċi fit-toroq, bħal Napuljun fi Vjal l-Indipendenza u Triq il-Merkanti, kif ukoll lil buffu komiku Karchoca, li ser ikun qed joffri spettaklu madwar it-toroq priċipali. Għal min irid jesperjenza xi ħaġa differenti, nirrakomandaw li żżuru Xarabubbles, spettaklu animat għall-familja kollha, b’teatru, dwal u bżieżeq tas-sapun li ser isir fi Pjazza Tritoni fuq palk ferm partikolari li żgur se jqanqal ħafna nostalġija.
Fil-knisja tal-Pilar, nistgħu nieħdu sehem f’quddiesa mhux tas-soltu, li fiha laqta sopranaturali, hekk kif l-ikoni ta’ qaddisin ‘minsijin’ ser jirribellaw u jgħidu tagħhom. Aħna naħsbu li waqt Notte Bianca, fil-knisja tal-Pilar mhux ser nisimgħu riti u antifoni, iżda daħq mill-parruċċani li ser jattendu.
Għal min hu ftit pastaż, u importanti, għal min ma jitkażax, jista’ jżur ir-rotta l-ħamra li tibda fl-għaxra ta’ billejl, partikolarment fl-Isplendid fi Strada Stretta, fejn ser tittella’ produzzjoni mill-pinna ta’ Trevor Zahra, interpretata minn Joseph Galea u Ċikku l-Poplu. Ta’ min jgħid li din il-produzzjoni, għalkemm komika, mhux għal kulħadd, u għandhom jattendu għaliha udjenza matura biss.
Tinsewx iżżuru l-Belt Valletta fl-1 ta’ Ottubru għal lejl imżewwaq bl-arti, l-kultura, l-mużika u divertiment mill-aqwa. Żgur li mhux ser jiddispjaċikom għaliex hemm xi ħaġa għal kulħadd.
Narawkom!
Aktar informazzjoni fuq www.festivals.mt/nb
