Tallinja Card meħtieġa għall-użu tat-trasport pubbliku b’xejn
Mill-1 ta’ Ottubru 2022, ir-Rotot tal-Ġurnata, Rotot ta’ matul il-Lejl u Servizzi Speċjali offruti minn Malta Public Transport se jsiru mingħajr ħlas għal dawk kollha li għandhom Tallinja Card personalizzata. L-aġġornament se jkun qed iseħħ awtomatikament, madankollu, il-passiġġieri huma meħtieġa li jużaw it-Tallinja Card personalizzata tagħhom mal-magna tal-biljetti kull darba li jitilgħu fuq il-karozza tal-linja.
Passiġġieri li jitilgħu fuq il-karozza tal-linja mingħajr it-Tallinja Card se jkunu obbligati jħallsu għal biljett bi flus kontanti jew pagament contactless mat-tlugħ tagħhom. L-Ispetturi ta’ Malta Public Transport se jkunu qed jagħmlu spezzjonijiet għall-għarrieda biex jivverifikaw li l-passiġġieri tal-karozza tal-linja qed jużaw it-Tallinja Card tagħhom jew inkella li jkunu xtraw biljetti. Se tkun applikata multa ta’ €50 għal kull passiġġier li jinqabad mingħajr Tallinja Card jew biljett.
Filwaqt li l-ebda kreditu mhu meħtieġ għall-ivvjaġġar fuq Rotot tal-Ġurnata, Rotot ta’ matul il-Lejl jew vjaġġi ta’ Servizz Speċjali, il-passiġġieri xorta se jkollhom bżonn kreditu fuq it-Tallinja Card personalizzata tagħhom sabiex jivvjaġġaw fuq Tallinja Direct jew Tallinja On Demand. Il-kreditu fuq it-Tallinja Card jista’ jintuża wkoll biex persuna tibbenefika minn rati mraħħsa fuq servizzi oħra ta’ mobilità, bħal Tallinja Bike u Valletta Ferry Services. Il-klijenti li jixtiequ jirċievu rifużjoni għall-kreditu tagħhom jistgħu japplikaw onlajn mill-1 ta’ Novembru 2022 permezz tas-sit ta’ Malta Public Transport. Se tkun applikata tariffa amministrattiva għal kull applikazzjoni għal rifużjoni.
Biex wieħed japplika għal Tallinja card, wieħed irid jirreġistra onlajn u jipprovdi dokument ta’ identifikazzjoni bħal Karta tal-Identità jew passaport, kif ukoll dettalji ta’ kuntatt personali bħal numru tat-telefon u indirizz tal-email. Tallinja Cards personalizzati mhumiex trasferibbli għal passiġġiera oħra u se tkun applikata multa ta’ €50 għal kull passiġġier li jinqabad juża Tallinja Card personalizzata maħruġa f’isem xi ħadd ieħor.
