Il-Biċċerija Pubblika Hija L-Ewwel Entità B’Sistema Ta’ Monitoraġġ Fuq Il-Konsum Tal-Elettriku U L-Emissjonijiet Ta’ Gassijiet Serra
Minister for Agriculture, Fisheries and Animal Rights Anton Refalo visits the Public Abattoir, the first entity in Malta implementing an integrated monitoring system of electricity consumption and emissions
Il-Biċċerija Pubblika hija l-ewwel entità f’Malta li bdiet timmonitorja, b’mod sistematiku, il-konsum tal-elettriku u l-emissjonijiet ta’ gassijiet serra skont l-hekk imsejjaħ Greenhouse Gas Protocol (GHG Protocol).
Waqt żjara fil-Biċċerija Pubblika, il-Ministru għall-Agrikoltura, is-Sajd u d-Drittijiet tal-Annimali Anton Refalo ddeskriva dan il-pass bħala azzjoni konkreta ta’ kif il-gvern qed jaħdem biex iżid l-effiċjenza u fl-istess ħin inaqqas l-impatt ambjentali tal-operat tiegħu. Il-Biċċerija Pubblika tassigura s-sigurtà tal-ikel billi tiffaċilita l-provvista ta’ laħam lokali. Il-proċessi ta’ iġjene jirrikjedu konsum qawwi ta’ enerġija, partikolarment biex jintlaħqu temperaturi għoljin neċessarji għall-isterilizzazzjoni tal-impjant u għodda differenti. Għaldaqstant inħasset il-ħtieġa li tiġi installata din is-sistema.
Il-GHG Protocol jipprovdi standards, linji gwida u għodda intiżi biex jgħinu lil gvernijiet u negozji jkejlu l-konsum tagħhom tal-enerġija kif ukoll l-emissjonijiet ta’ gassijiet li qed jikkawżaw il-bidla fil-klima. Din is-sistema taqsam l-emissjonijiet fi tlieta, dawk diretti bħall-emissjonijiet minn użu ta’ fjuwil, dawk indiretti bħall-emissjonijiet mill-konsum tal-elettriku u dawk addizzjonali bħall-emissjonijiet minn trasport ta’ prodotti u vjaġġar.
Uffiċjali tal-kumpanija ClearVUE, li qed jassistu lill-Biċċerija Pubblika f’dan il-monitoraġġ, spjegaw lill-Ministru Refalo kif taħdem is-sistema, u kif qed jiġu identifikati oqsma, proċessi u investimenti oħra li jistgħu jgħinu lil dan l-impjant jnaqqas l-impatt ambjentali tiegħu u fl-istess ħin jikseb riżultati aħjar.
“Dan il-pass li qed nieħdu huwa turija tal-isforz li qiegħed isir mill-ministeru biex il-Biċċerija Pubblika ssir vetrina ta’ effiċjenza u kwalità. Fl-istess ħin qed inkomplu nikkontribwixxu għat-twettiq tal-wegħda elettorali li nżidu l-effiċjenza fl-operat tal-Biċċerija Pubblika b’risq ir-raħħala lokali,” temm jgħid il-Ministru Anton Refalo.
