Pajjiżna sabiħ, mhux perfett imma ngergru wisq?

Pajjiżna bid-difetti li nsibu fih u li anke ħafna minnhom huma difetti tagħna stess fl-imġieba, l-attitudni u l-mentalità, huwa sabiħ. Dan huwa fatt li lkoll nemmnu u naħsbu li naqblu fuqu. L-istorja, il-kultura, l-imkejjen u anke n-nies stess li għadna kif semmejna li kapaċi jkunu huma parti min-negattiv.

Issib minn kollox. Issa min jikkritika għax hekk iħobb … kif jgħid il-Malti anqas jekk tagħmillu l-ilma jiżfen. Issa imbagħad min jikkritika għaliex iħoss qalbu tuġgħu li pajjiż bħal tagħna, bi ftit iżjed attenzjoni kapaċi jkun fost l-iprem. Issib min ikollu aġenda politika jew inkella anke dawk li verament ma jaraw xejn tajjeb. L-opinjoni hija d-dritt tal-individwu u hekk għandu jkun.

Imma rridu niftakru wkoll li Malta u meta ngħidu Malta b’mod awtomatiku qed tinkludi lil Għawdex u Kemmuna, għax dak huwa l-arċipielgu Malti, hija ferm sabiħa. Apparti t-temp (li qed jinbidel ukoll), għandna ħafna tajjeb. Għandna aspetti li fihom morna ‘l quddiem u oħrajn li forsi tenħtieġilhom iżjed attenzjoni. Suġġett li bla dubju huwa fuq quddiem fl-imħuħ tan-nies huwa l-ambjent. Ma nistgħux nibqgħu nżidu bini bla rażan biex insaħħu l-ekonomija tagħna meta dan qed ikerraħ, almenu jekk nibnu, jenħtieġ stil (skyline) bħal pajjiżi kbar fejn il-karattru Malti jibqa’ u l-progress ma jieqafx.

Madanakollu, irridu nkomplu nħobbu lil Malta tagħna għaliex din hija darna. Imma kulħadd jaħsibha hekk? Inti x’taħseb dwar dan?Pajjiżna sabiħ, mhux perfett imma ngergru wisq?