X’tippreferi: kelb jew qattus?

Fost l-animal lovers se ssib dawk li jippreferu l-klieb u dawk li jippreferu l-qtates. Meta dawn jiltaqgħu tarahom jidħlu f’diskussjoni ta’ liema pet huwa l-aħjar, jagħtik l-aktar imħabba, jagħtik l-inqas xogħol u diversi suġġetti oħrajn.

Jekk inti għadek ma tafx jekk tagħmilx man-naħa tal-klieb jew inkella tal-qtates, f’dan l-artiklu se nippruvaw ngħidulkom ftit punti taż-żewġ tipi ta’ furry friends biex forsi ngħinukom taslu għal konklużjoni.

Il-qtates

• Huma kkunsidrati bħala kreaturi indipendenti u li kapaċi joqgħodu għal perjodi itwal waħedhom.
• Huwa aktar faċli li jkollok qattus jekk tgħix f’dar żgħira jew f’appartament.
• Huma annimali low maintenance u ma jridux attenzjoni kontinwa.
• Madanakollu, huma t-tip li jħobbu l-fsied u li jfittxuk biex jitmellsu miegħek jew jorqdu fuq ħoġrok.
• M’għandekx bżonn toħroġhom biex jagħmlu l-bżonnijiet tagħhom iżda dan ifisser li jrid ikollok litter box u li trid tnaddafha frekwentament.
• Ġeneralment huma annimali kwieti, madanakollu ġieli ssib xi wieħed li jqajmek biex ittih tiekol jew li jħobb jitkellem!
• Jgħixu ħajja itwal mill-klieb.
• Għandhom ħabta jigirfu l-għamara jekk ma tipprovdix biżżejjed scratching posts fid-dar.
• Furry friends ifisser li se jaqgħalhom is-suf ukoll, jiġifieri trid tlesti ruħek.
• Ikollhom ukoll mumenti inqas pjaċevoli bħal meta jirremettu xi naqra hairball.

Il-klieb

• Kapaċi joffru imħabba bla limitu u huma leali ħafna.
• Iħobbu jilgħabu ta’ kuljum.
• F’ambjenti soċjali jgħinuk tavviċina n-nies u tibda amiċizzji ġodda.
• Il-mixja li jridu jagħmlu ta’ kuljum tgħinek iżżomm lilek innifsek attiv.
• Jipproteġu lilek u lil darek.
• Iħobbu l-fsied, speċjalment meta jaraw li wasal il-ħin biex tirrilassa.
• Trid tiddedika ħin għalihom kemm biex toħroġhom jimxu, kif ukoll biex tilgħab magħhom.
• Trid ħafna iktar żmien biex tgħallimhom jagħmlu xi ħaġa, jiġifieri jrid ikollok il-paċenzja u tkun konsistenti.
• Għandhom bżonn aktar spazju fejn jgħixu u idealment aċċess għal xi bitħa.
• Il-klieb kapaċi jkunu aktar storbjużi.
• Meta se ssiefer mingħajrhom trid tara ssibx lil xi ħadd li ta’ kuljum joħroġhom u joqgħod ammont ta’ ħin magħhom.
• Biex tieħu ħsiebhom trid tinvesti aktar flus.