Għaliex għandek tistudja lingwa barranija?
![Għaliex għandek tistudja lingwa barranija?](https://stradarjali.com/wp-content/uploads/2024/07/Web_Banner_4-2-850x560.png)
Ħafna miż-żgħażagħ illum donnhom naqsitilhom il-motivazzjoni li jitgħallmu lingwa barranija. L-interess f’dawn il-lingwi m’għadux qawwi bħal qabel. X’aktarx l-influwenza tal-globalizzazzjoni ġabitna kemmxejn għażżenin għax nafu li bl-Ingliż nistgħu nilħqu nies differenti mingħajr sforzi żejda.
Fil-verità li bniedem ikun jaf l-Ingliż mhux biżżejjed. L-għarfien ta’ lingwa oħra barranija tista’ tiffaċilita kemm il-ħajja professjonali u anke dik personali. Il-lingwi fihom il-faxxinu tagħhom, jagħtuna ħbiberiji ġodda u ħafna aktar. Ser insemmu xi wħud mill-benefiċċji ta’ meta wieħed jistudja l-lingwi barranin.
- Kunfidenza personali
Minkejja d-diffikultajiet li joffru l-lingwi, il-mument li tibda tidrahom jagħtuk sens qawwi ta’ soddisfazzjon, speċjalment meta tgħin lil xi turist jew tkun il-punt ta’ riferiment fuq il-post tax-xogħol
- Titjieb fil-konċentrazzjoni u l-memorja
Ir-riċerka turi li l-istudju tal-lingwi jimpatta lill-moħħ b’mod pożittiv. Il-memorja titjieb fuq livelli differenti. Fil-fatt, il-moħħ jagħmel kalkoli aktar kumplessi u jkun kapaċi jagħraf l-informazzjoni l-aktar rilevanti. Persuni li jistudjaw il-lingwi għandhom it-tendenza li jikkonċentraw aktar.
- Mentalità iktar miftuħa
It-tagħlim tal-lingwa ma jinkludix biss il-lessiku jew l-aspetti grammatikali imma anke l-għarfien dwar il-kultura u d-drawwiet tan-nies tal-pajjiż. Bniedem ikun jista’ jifhem aħjar barrani u għal ftit mumenti jħoss li għandu bħal identità oħra xi jkompli tiskopri. L-għarfien ta’ lingwi oħra jwassluna biex inkunu persuni aktar tolleranti.
- Tgħix u taħdem barra minn pajjiżek
Għal min ikollu ħsieb li jmur jgħix barra, l-għarfien tal-lingwa tal-post hija ta’ benefiċċju. Mhux dejjem faċli taqbad il-lingwa tal-post waqt li tkun qed taħdem. Meta tkun preparat minn qabel tkun tista’ tintegra ruħek fuq il-post tax-xogħol jew fis-soċjetà mingħajr xkiel żejjed.
- Żvilupp tal-kreattività u l-iżvilupp tal-ħsieb astratt
L-istudji dejjem urew li sa minn età bikrija ħafna, it-tfal huma kapaċi jaqbdu lingwi differenti mingħajr sforz żejjed. Ir-ricerka tindika li meta bniedem ikun jaf ħafna lingwi, xi areas tal-moħħ jiżviluppaw aktar u għaldaqstant għandhom ċans li jieħdu deċiżjonijiet korretti u fl-inqas ħin possibli.