X’deodorant tuża?

Kull parti minn ġisimna rridu nieħdu ħsiebha, u l-abtejn xejn b’inqas. Fil-fatt, taħt idejna huwa sensittiv u rridu nieħdu ħsiebu anke billi nużaw prodotti tajbin. Dan nistgħu nagħmluh billi nużaw deodorant li jkun adattat għalina. Fis-supermarkets ikun hemm minn kull tip ta’ deodorant, imma int, kif għandek tagħżel dak li hu aħjar għalik?

L-aktar tlett tipi ta’ deodorants komuni huma: l-ispray, ir-roll on u anke l-creams. Tajjeb infakkru li dak li jkun m’għandux jaqsamx ir-roll on deodorant tiegħu ma’ ħaddieħor minħabba kwistjoni ta’ iġjene. Dak li jkun jista’ jagħżel bejn perspirant jew anti-perspirant. Deodorant anti-perspirant inaqqas l-ammont ta’ għaraq u idealment ikun tajjeb għal min jogħroq b’mod eċċessiv. Xogħol id-deodorant huwa li joqtol kemm jista’ jkun il-batteri minn taħt l-idejn u normalment ikun magħmul minn bażi ta’ alkoħol. L-antiperspirants pero’ huma magħmula minn materjali oħra li jagħlqu l-glandoli tal-għaraq. Dawn il-prodotti huma siguri imma jkun tajjeb li dak li jkun ma jużahomx għal tul ta’ żmien għal ħafna snin.

X’għandek tikkunsidra xħin ser tagħżel liema deodorant ser tuża?

1. Ara fejn ser tkun. Jekk ser tkun xi mkien li trid iktar kontroll u tistħi li ser tkun qed togħroq ħafna, l-anti-perspirant għal dak il-mument ikun l-aqwa għażla.
2. Kun ċert li taf x’ tip ta’ ġilda għandek.
3. Uża prodotti magħmula minn ingredjenti naturali u delikati. Per eżempju deodorants magħmula minn kristalli tal-potassju jeqilbu ir-riħa tal-għaraq f’riħa iktar naturali. Hemm ukoll deodorants magħmula minn ingredjenti naturali bħal ngħidu aħna klin u salvja.

U int, tagħti kas x’tuża u ma tużax?