X’jagħmlek Malti?
Ftit tal-jiem ilu inqalgħet ftit kontroversja għax persuna rebħet konkors tas-sbuħija. Nimmaġina illi ammont kbir ta’ nies, kieku mhux għax rebħet dan il-konkors persuna ta’ karnaġġjon skur u li ma twelditx f’ Malta, la kienu jkunu jafu li sar il-konkors u wisq aktar min rebħu.
Ħafna nies ikkummentaw fuq il-midja soċjali li mhux sew li persuna mhux Maltija rebħet kompetizzjoni f’Malta. L-istess kummenti smajnihom dwar uħud mill-kontestanti ta’ Love Island. Għax dawk mhux Maltin.
Imma x’jagħmilna Maltin eżatt?
Li nkunu twelidna f’Malta? Imma jekk l-omm u l-missier ikunu qed jgħixu barra minn pajjiżna meta titwieled tarbija, allura t-tarbija mhux xorta Maltija minkejja li mwielda barra?
Li l-ġenituri jkunu Maltin? Tajjeb, imma dawk it-tfal illi ġenitur minnhom ikun barrani, mhux xorta jkun Malti?
Li nitkellmu bil-Malti? Imma f’Malta għandna żewġ lingwi uffiċjali u dak li jkun għandu dritt jagħżel b’liema lingwa jitkellem?
Il-kulur tal-ġilda? U liema hu l-kulur eżatt tal-Malti. Ir-razza Maltija għaddiet u tħalltet ma’ diversi persuni, minħabba diversi ċirkostanzi
Il-karattru? Il-qalb tajba u l-istorbju huma marbuta mal-poplu Malti. Imma mhux il-poplu kollu hu hekk
L-ikel u nuqqas ta’ eżerċizzju. Dawn ukoll huma sinonimi ma’ ħafna nies Maltin. Imma meta ngħidu hekk inkunu qed niġġeneralizzaw
Inkunu qed niġġenneralizzaw, kif qed nagħmlu fuq kollox. Jagħmilna Maltin l-imħabba għal pajjiż, u mhux skont x’kulur hi l-ġilda jew b’liema lingwa nitkellmu
