Prinċipji li għandek tirrispetta meta tkun mistieden għand xi ħadd
Meta fin-nofs ikun hemm stedina, għandu jkun hemm attenzjoni mhux biss mingħand min qed jistieden imma anke mill-mistednin stess. Ser insemmu xi prinċipji li għandna nħarsu dejjem kemm-il darba nkunu sejrin għand xi ħadd.
Żomm f’moħħok –
- Il-puntwalità
Il-puntwalità hija importanti f’kull ċirkustanza. Ta’ min jgħid iżda, li biex timxi kif sippost meta tkun mistieden, bniedem għandu jasal ħames minuti iktar tard mill-ħin mifthiehem. Importanti wkoll, li mhux biss m’għandniex inkunu tard, imma lanqas kmieni ħafna mill-ħin stabbilit.
- Tmurx b’idek vojta
Qatt tmur b’idek vojta. Evita xi mazz fjuri għaliex jista’ jkun li sid id-dar ma jkollux fejn iqiegħdhom. Jekk trid tagħti fjuri, ibgħathom filgħodu jew inkella l-għada tal-istedina. Idealment, lanqas tieħu ħelu, sakemm ma tkumx ftiehemt ma’ dak li jkun. Dan għaliex tkun qisek qed tassumi li min qed jilqgħek ma ħasibx għad-deżerta. Tista’ tieħu xi oġġett li jintuża fid-dar jew inkella xi ħaġa għat-tfal jekk ser ikunu preżenti.
- Tippreżentax ruħek ma’ xi ħadd li ma jkunx mistieden
Xejn mhu ovvju. Kun ċert li meta tkun mistieden, il-persuna li qed tilqgħek turik jekk tistax tmur bit-tfal, jew mal-partner jew ma’ xi ħabib/a. Mhix sabiħa jkollok iżżid post li ma tkunx preparat għalih.
- Tużax il-mowbajl waqt li tkun fuq il-mejda
Mhux prudenti li jintuża l-mowbajl. Mhux biss m’għadux jintuża imma lanqas jitħalla fuq il-mejda fejn xi platt. Jekk dan isir tkun qisek qed tgħid min qabel li mhux ser ikun hemm xi tip ta’ konversazzjoni interessanti. Tistaqsix għall-password tal-WIFI u l-aħjar il-mowbajl ikun fuq silent.
- Taqbadx argumenti delikati
Evita li titkellem fuq suġġetti sensittivi jewli joħolqu kontroversji. Argumenti bħal reliġjon, sesswalità u politika għandek twarrabhom, aktar u aktar jekk lil min qed jistiednek ma tafux daqshekk tajjeb. Dejjem agħżel argumenti ‘newtrali’ ħalli ma tiżbaljax.
- Aċċetta dak li qed tiġi offrut
Sakemm ma jkollkomx xi allerġiji, evitaw li ma tiħdux l-ikel. Importanti li tavżaw minn qabel. Etikament, il-mistednin jieħdu minn dak li jiġi offrut mingħajr tgergir.
- Ringrazzjamenti
Bla dubju, għandna dejjem nirringrazzjaw qabel ma nitilqu mid-dar. Tkun ħaġa sabiħa li wara l-istedina tibgħat messaġġ jew tagħmel telfonata biex lil dak li jkun terġa’ tirringrazzjah.
