Din iż-żeffiena għamlet xi ħaġa f’Amici li ħadd qatt m’għamilha qabel…

Jekk rajtu l-episodju ta’ Amici tal-Ħadd li għadda, mela rajtu l-ġest ħelu li għamlet waħda mill-istudenti żeffiena ta’ din is-sena. Teodora affrontat sfida li setgħet twassal għall-eliminazzjoni tagħha mill-edizzjoni ta’ din is-sena. Dan wara li fl-episodju tal-Ħadd ta’ qabel hi kienet ġiet l-aħħar fil-klassifika taż-żeffiena. 

Teodora rebħet l-isfida u kkonfermat mill-ġdid il-post tagħha f’din l-iskola li ffurmat tant u tant żeffiena u kantanti fl-Italja. Iżda fejn is-soltu kulħadd jgħid “grazzi” u jmur lura mal-bank tiegħu, Teodora, li hija Spanjola, kitbet ittra li qrat immedjatament wara l-isfida.

Fl-ittra, Teodora rringrazzjat lil kulħadd talli qed tkompli tingħata l-opportunità li timxi ‘l quddiem b’din “l-esperjenza meraviljuża minn kull aspett.” Talbet skuża lill-għalliema tagħha Deborah, talli l-prestazzjoni tagħha tal-ġimgħa ta’ qabel ma kinitx suffiċenti, u spjegat li ma kinitx ħassitha sew fiżikament, madanakollu temmen li setgħet tagħmel aħjar. Qaltilha li se tagħmel minn kollox biex tkun kburija biha.

Hi kompliet billi rringrazzjat lill-programm Amici talli qed jgħinna tirrealizza l-ħolma tagħha u li qed jippermettilha tgħix tagħmel dak li tħobb: iż-żfin.

Wara li qrat l-ittra tagħha, il-preżentattriċi ta’ dan il-programm, Maria de Filippi, qalet, “taf xiex? Dan il-programm ilu għaddej għal ħafna u ħafna snin. Qatt ma kien hawn persuna oħra li għamlet ġest bħal dak li għamilt inti llum. Nixtieq ngħidlek dan. Kellek tiġi inti minn Spanja biex tagħmlu.”