Din il-familja Maltija qed iżżomm it-tradizzjoni tal-ħsajjar ħajja!
F’Malta hawn familja li flimkien taħdem fuq il-ħsajjar tradizzjonali tal-injam. Ruben Mizzi, minn Mizzi Wooden Blinds tkellem mat-tim ta’ Strada Rjali u rrakkonta l-istorja ta’ kif hu u familtu bdew jagħmlu dan ix-xogħol.
“10 snin ilu kont f’ħanut lokali mal-mara u hemm rajt ħasira tal-injam. Xtrajniha, u l-mara staqsietni jekk irridx nagħmlu wkoll it-twieqi u l-bibien tal-bqija tad-dar bil-ħsajjar,” spjega Ruben. Ħu l-mara tiegħu, Donald, li huwa mastrudaxxa, ħeġġu biex jagħmilhom hu. Fassallu magna biex tgħinu jqatta’ l-listi tal-injam u ftit wara tella’ filmat fuq il-paġna ta’ Facebook bl-isem ta’ Mizzi Wooden Blinds.
“Ftit wara bdew deħlin l-ordnijiet…bdejt bil-qraba u l-ħbieb u wara bdew ġejjin anke persuni oħrajn. Tant li spiċċajt nagħmel ix-xogħol għall-klijenti qabel lestejt dawk li suppost bdejt nagħmel għalijja,” spjegalna Ruben.
Apparti li kompla jitgħallem u jirfina l-ħila tiegħu maż-żmien, Ruben għallem ukoll lill-mara u lit-tfal tiegħu sabiex jagħmlu l-istess xogħol bħalu. Sostna li ħafna drabi jkunu tliet persuni jaħdmu fuq ħasira waħda – xi ħaġa li sservi wkoll bħala ħin sabiex il-familja tkun miġbura flimkien.
“Dejjem nara li nixtri u nuża l-aħjar materjal u ninsisti biex lill-klijenti tiegħi noffrilhom l-aqwa prodott. Id-dettalji joħorġu mil-lazz, l-injam u ż-żebgħa li tuża, kif ukoll il-mod kif tqabbilhom flimkien,” irrimarka hu. “Jekk nara li xi strippa tal-injam ma ġietx sew, ma noqgħodx ngħid għax hekk jew għax hekk, inwarrabha. Il-kwalità tal-prodott hija kruċjali għalijja.”
Kompla billi spjega s-sodisfazzjon li jħoss meta jmur iwaħħal il-ħsajjar għand il-klijenti u jisma’ u jara r-reazzjonijiet tagħhom. Spjega li l-ħasira tgħinek tipproteġi lill-bieb tiegħek, għax tipproteġih mill-elementi, partikolarment mix-xemx. Apparti minn hekk, jgħaddi wkoll il-frisk minnhom.
Jekk interessat għal xi ħasira għad-dar tiegħek, tkellem ma’ Ruben minn Mizzi Wooden Blinds billi tikkuntattjah fuq 7991 3260 jew inkella tibgħat imejl fuq [email protected].
