Is-Selfmade Market jittella’ mill-ġdid fil-Belt Valletta fil-5 ta’ April
It-tielet edizzjoni tas-Selfmade Market se tkun qed terġa’ tittella’ nhar il-5 ta’ April fi Pjazza Jean de la Valette fil-Belt Valletta. Hawn se ssibu 27 artiġjana u persuni kreattivi li se jkunu qed jeżibixxu l-prodotti kreattivi tagħhom bejn il-11am u t-8pm.
Dan l-avveniment huwa organizzat mill-komunità nofacemt, b’kollaborazzjoni ma’ Lincole Handmade u Carina Print and Designs. Dawk kollha li jattendu se jkunu jistgħu jaraw u anke jixtru diversi prodotti uniċi inkluż pitturi, dekorazzjonijiet għad-djar, ġojjellerija, ċiramika, prodotti magħmulin bil-ganċ u ħafna aktar.
“Vera ninsabu kuntenti li qed nerġgħu ntellgħu edizzjoni oħra tas-Selfmade Market,” qal Johann Agius minn nofacemt. “Dan l-avveniment iservi bħala pjattaforma għal artiġjana lokali sabiex jeżibixxu l-prodott tagħhom, jikkomunikaw mal-pubbliku u jiċċelebraw flimkien it-talent lokali, fil-belt kapitali.”
Nicole u Elenia Borg minn Lincole Handmade u Jessica Magro minn Carina Print and Designs żiedu jgħidu, “Din hija opportunità perfetta għall-pubbliku biex jiskopri prodotti uniċi filwaqt li juri s-support tiegħu għat-talent lokali. Nieħdu pjaċir ħafna noffru opportunitajiet lil persuni kreattivi li qabel jaf ma kellhomx l-opportunità li jipparteċipaw f’avvenumenti tat-tip. Jekk forsi qed tfittex xi rigali, issa anke li l-Għid daqt jinsab magħna, żgur se ssibu għażliet uniċi waqt dan l-avveniment.”
Jekk tixtieq issir taf aktar dwar dan l-avveniment, tista’ tgħafas hawn.
