Jitħabbru L-Preżentaturi Ta’ Mużika Mużika!
Il-bieraħ fuq il-programm Illum ma’ Steph ġew imħabbra l-preżentaturi tal-festival tant mistenni li ser jerġa jitfa’ l-mużika Maltija fil-quċċata tax-xena mużikali lokali. Keith Demicoli, Lara Azzopardi, Sarah-Lee Zammit u Claire Agius Ordway ser ikunu qed jippreżentaw it-tliet serati ta’ Mużika Mużika – Festival Kanzunetta Maltija f’Marzu li ġej.
Issa li fadal inqas minn xahar għal dan il-festival, il-preżentaturi jinstgħabu ħerqana biex ikunu jistgħu iwasslulna dan l-ispettaklu fuq it-televiżjoni tagħna. “Vera ħadt pjaċir li ser nerġaw naraw l-Festival Kanzunetta Maltija bħal ma’ kien qabel”, qalet Claire Agius Ordway flimkien ma’ Sarah-Lee Zammit. Filfatt, il-festival ser ikun qed jonora l-edizzjonijiet passati tiegħu b’kompożizzjonijiet bil-malti li ser jiġu interpretati live, akkumpanjati mill-Malta Philharmonic Orchestra. Minkejja dan, xorta ser ikun hemm diversi sorpsiżi u elementi uniċi li jispikkaw fil-festival inkluż palk grandjuż, l-aħħar tekonoloġija awdjoviżiva u kompożizzjonijiet b’ġeneri differenti li juru l-versatilita` tal-mużika Maltija.
Il-Kap Eżekuttiv ta’ Festivals Malta, Annabelle Stivala ingħaqdet ma’ Keith Demicoli u Lara Azzopardi fejn żvelaw aktar fuq il-loġistika u l-preparamenti li qed isiru għal dan il-festival. Qalu wkoll li minħabba l-pandemija kurrenti il-festival mhux ser ikollu udjenza imma ser ikun totalment imxandar fuq it-televiżjoni. Minkejja dan, il-festival xorta ser joffri produzzjoni minn l-aqwa. “Il-produzzjoni u l-organizzazzjoni li hemm warajħ huwa fenomenali. Allura dak ifisser li ser tkun produzzjoni ta’ livell għoli ħafna”, jgħid Keith Demicoli.
Aħna ċerti li dan il-festival ser ikun wieħed ta’ suċċess u ninsabu eċitati ferm biex jasal il-jum fejn nisimgħu il-kanzunetti li l-parteċipanti ilhom tant jaħdmu fuqhom. Il-festival ser jixxandar fuq TVM fid-disgħa ta’ filgħaxija fit-18, 19 u 20 ta’ Marzu 2021.
Nixtiequ nawguraw il-kantanti, awturi u l-kompożituri l-akbar suċċess.
Aktar informazzjoni fuq il-festival:
Sit Elettroniku – www.muzikamuzika.org
Facebook – www.facebook.com/muzikamuzika.mt
Instagram – www.instagram.com/muzika_muzika.mt
