Winston Muscat Fit-Tmun Ta’ Sirens FC

Fl-aħħar sigħat Sirens FC ħabbru li Winston Muscat huwa l-kowċ il-ġdid tat-tim minn San Pawl il-Baħar għal istaġun li gej. Huwa ser ikun qed jieħu post it-taljan Giovanni Tedesco li kien ħa f’idu t-tmexxija tat-tim lejn tmiem is-sena 2020.

Muscat, matul l-istaġun li għadda, kien mexxa lill-Tarxien Rainbows qabel r-riżenja f’Frar ta’ din is-sena. Matul il-karriera tiegħu huwa mexxa numru ta’ timijiet fosthom Vittoriosa Stars, Naxxar Lions u Pembroke Athleta kif ukoll lit-tim nazzjonali Malti ta’ taħt il-19 il-sena.

Il-ħidma għal staġun ieħor diġa bdiet u filfatt lis-stess Sirens ħabru l-akkwist tal-goalkeeper Jonathan Debono. Matul l-istaġun li għadda Debono kien wieħed mill-goalkeepers fit-tim ta’ ċampjins Hamrun Spartans.

Ritratt: Sirens FC