Binja Antika F’Birkirkara Se Tkun Ikkonvertita F’Ċentru Għal Tfal B’Diżabbilità U Bl-Awtiżmu
Minister for Social Accommodation Roderick Galdes oversees the signing of an MOU between the Housing Authority and The Malta Trust Foundation Psaila Street, Santa Venera (in front of Park Towers)
Permezz ta’ ftehim iffirmat dalgħodu, il-gvern se jassisti fir-riġenerazzjoni ta’ binja antika f’Birkirkara biex tiġi konvertita f’ċentru tal-mużika għal tfal b’diżabilità u bl-awtiżmu. Dan se jkun l-ewwel ċentru tax-xorta tiegħu f’Malta.
Il-Ministru għall-Akkomodazzjoni Soċjali Roderick Galdes, flimkien maċ-Chairperson tal-Malta Trust Foundation u l-President Emeritus Marie-Louise Coleiro Preca u mal-Kap Eżekuttiv tal-Awtorità tad-Djar Leonid McKay, kien preżenti għall-iffirmar ta’ ftehim għal xogħlijiet ta’ restawr f’Villa Bianca f’Birkirkara.
Bis-saħħa ta’ dan il-ftehim, il-gvern permezz tal-Awtorità tad-Djar ippreżenta lill-Malta Trust Foundation, immexxija mill-President Emeritus Marie Louise Coleiro Preca, is-somma ta’ €58,543 li se jgħinu biex jitwettaq ir-restawr neċessarju.
Il-Ministru Galdes fisser li din il-villa ġiet mogħtija minn familja privata, Maurice u Francina Abela, lill-Malta Trust Foundation b’risq tfal u żgħażagħ b’diżabilità u l-fondi allokati mill-iskema għal persuni b’diżabilità li toffri l-Awtorità tad-Djar qed jikkontribwixxu sabiex isirulha xogħlijiet biex toffri ambjent xieraq lil dawn it-tfal u ż-żgħażagħ.
“Grazzi għal dawn il-fondi allokati mill-gvern permezz tal-Awtorità tad-Djar, tfal bl-awtiżmu u persuni b’diżabilità li jsibu wens fil-mużika ħa jkunu jistgħu jitgħallmu iżjed u jkomplu jiżviluppaw il-ħiliet tagħhom,” qal il-Ministru Galdes u faħħar ukoll ħidmet tal-Malta Trust Foundation u qal li dan il-ftehim qed isir flimkien ma’ għadd ta’ għaqdiet mhux governattivi oħra bħal The Down Syndrome Association, The Autism Parents Association u ADVICE.
Il-President Emeritus Marie-Louise Coleiro Preca, iċ-Chairperson tal-Malta Trust Foundation, saħqet li, “Dan huwa proġett storiku li se jimla spazju fil-qasam tal-mużika u tal-arti performattiva għal dawk it-tfal bi bżonnijiet diversi li sal-lum ma kellhomx opportunità li jiżviluppaw dawn il-ħiliet. Dan huwa proġett ta’ inklużjoni li permezz ta’ servizz speċjalizzat se jagħti opportunità lil dawn it-tfal sabiex jieħdu gost bil-mużika u bl-arti performattiva filwaqt li jikbru u jifjorixxu f’dawn l-oqsma sabiex jilħqu l-milja tal-potenzjal tagħhom. Nirringrazzja lill-Ministru Roderick Galdes tas-sensittività li wera u tas-sapport li ta sabiex jgħin f’parti mill-ispiża tax-xogħol infrastrutturali ta’ din id-dar. Dan huwa proġett li se jkun sewa lil The Malta Trust Foundation is-somma kapitali ta’ €100,487 u investiment ta’ €250,000 fi tfal b’abbiltajiet differenti ta’ kull sena.”
