Jaslulu Tliet Kaxxi B’Madwar 18,000 Sigarett B’Sustanza Llegali Suspettata Kannabis
Kanadiż ta’ 62 sena qiegħed jinżamm arrestat b’rabta ma’ importazzjoni, traffikar u pussess aggravat ta’ droga cannabis.
Fi stqarrija mill-uffiċċju tal-komunikazzjoni tal-pulizija, intqal li r-raġel ġie arrestat nhar il-Ġimgħa 25 ta’ Ġunju 2021, mill-Pulizija mill-Iskwadra ta’ Kontra d-Droga. Dan wara ġew infurmati mid-Dipartiment tad-Dwana illi kienu waslu tliet kaxxi li fihom kien hemm madwar tmintax–il elf sigarett b’sustanza illegali suspettata ħaxixa tal-cannabis. Mill-investigazzjonijiet li saru rriżulta jirriżulta li s-sigaretti kienu ndirizzati lir-raġel, residenti s-Swieqi.
Minn tfittxijiet ulterjuri illi saru fir-residenza tiegħu fis- Swieqi nstabu aktar prodotti oħra magħmulin minn estratti tal-kannabis kif ukoll ammont ieħor ta’ sigaretti simili għal dawk illi waslu bil-posta.
Rigward dan il-każ infetħet inkjesta mmexxija mill-Maġistrat tal-Għassa Dr. Charmaine Galea. Ir-raġel mistenni jitressaq il-Qorti aktar tard illum għall-ħabta tal-għaxra ta’ filgħodu (1000hrs), akkużat b’importazzjoni, traffikar u pussess aggravat ta’ droga cannabis.
Il-Prosekuzzjoni se titmexxa mill-Ispetturi Alfredo Mangion u Justine Grech.
