Bil-Filmat: Il-Ballu Tal-Qamar T’Awwissu 2021 Suċċess B’Riżq Kawża Ġusta
Bil-protokolli kollha kif suppost u b’attenzjoni kbira fuq ir-restrizzjonijiet ta’ waqt il-pandemija tal-Covid-19, il-Ballu tal-Qamar t’Awwissu 2021 kien suċċess.
Il-pubbliku li attenda seta’ jinnota l-organizzazzjoni perfetta tas-serata b’imwejjed b’6 persuni u anke b’żewġ sezzjonijiet ta’ ‘bubbles’ fejn dawk ta’ ‘bubble’ ma setgħux jaqsmu għan-naħa tal-‘bubble’ l-oħra. Kien innutat kemm anke l-pubbliku żamm mar-regoli u spikka l-messaġġ tal-Eċċellenza Tiegħu l-President ta’ Malta George Vella li l-mard ma jistennhiex, u għalhekk din l-okkażżjoni għenet ħafna biex jinġabru fondi b’riżq The Malta Community Chest Fund.
Is-serata kienet imżewqa bil-banda tal-Forzi Armati ta’ Malta u l-Cordia Ensemble bis-sehem tal-kantanti: Georg Zammit li huwa membru tal-armata nnifsu, Nicole Frendo, Tiziana Calleja u Ivan Grech mill-Wintermoods. Is-serata tmexxiet mill-preżentatur bravu u popolari Wayne Aquilina.
Mument ħelu kien meta l-kantant Ivan Grech minn Wintermoods kanta l-kanzunetta Xemx bil-pubbliku joħroġ il-mobile u jixgħel id-dawl tiegħu li ħoloq atmosfera mill-isbaħ.
Minn Stradarjali.com, nifirħu lill-Eċċellenza Tiegħu flimkien mas-Sinjura Miriam Vella u t-tim kbir u formidabbli tal-organizzazzjoni u l-istamina ġenwina biex jaħdmu favur il-ġid tal-poplu Malti u Għawdxi kollu.
