Tenishia U Paul Van Dyk F’Gutenberg Fl-Isvezja – L-Aktar Artist Malti Li Ta’ Prestazzjonijiet Barra Minn Malta
Id-DJ Internazzjonali Malti Tenishia ser ikun qed jingħaqad mad-DJ leġġenda Paul van Dyk għal prestazzjoni f’Gutenberg fl-Isvezja nhar is-Sibt 16 ta’ Ottubru. Id-DJ Malti ħabbar dan fuq il-mezzi soċjali tiegħu ftit tal-jiem ilu hekk kif kien għadu kemm itemm avventura mużikali oħra fi Bloemendaal f’Olanda.
Joven qal li hu daqq jew fetaħ għal Paul van Dyk diversi drabi madwar id-Dinja, b’okkażjoni partikolari ħafna tkun dik ta’ Birmingham fl-Ingilterra fl-2013 fil-club leġġendarju Gatecrasher.
Għalkemm żar ħafna pajjiżi din ser tkun l-ewwel darba li Tenishia ser idoqq fl-Isvezja li b’mod umoristiku hu iddeskriva bħala l-art tan-nisa bjondi sbieħ! Eżatt kif iħobbhom hu!
Huwa qal li fl-2019 huwa kien rażżan l-ivjaġġar tiegħu b’mod drastiku minħabba problemi ta’ saħħa, u saħansitra anke kien qed jikkonsidra li jwaqqaf il-karriera internazzjonali tiegħu li ratu jibdel disa’ passaporti f’għaxar snin. Fl-aħħar snin hu beda jqatta il-fuq minn erbgħin siegħa fil-ġimgħa ta’ vjaġġar bla waqfien. Huwa tenna li l-pandemija ġegħlitu jieħu break itwal milli maħsub u issa iħossu lest biex bil-mod jibda jagħti test ieħor lilu innifsu bl-ivjaġġar, din id-darba bi stil ġdid ta’ mużika li hu qed idoqq.
L-ewwel prestazzjoni internazzjonali ta’ Tenishia tmur lura għal l-2007 fejn hu kien daqq għal-ewwel darba barra minn Malta, f’Melbourne fl-Awstralja. Minn dak inhar huwa baqa’ jibni il-karriera tiegħu li ħaditu fl-aqwa Festivals u clubs madwar id-Dinja kollha inkluż erba’ prestazzjonijiet fil-famuż Tomorrowland fil-Belġju.
Għal ħames snin klassifikat bħala wieħed mil-aqwa Djs fid-Dinja u b’eluf ta’ segwaċi minn madwar id-dinja kollha, Tenishia huwa l-iktar artist Malti minn kull ġeneru li ta’ prestazzjonijiet barra minn xtutna, b’medja ta’ 50 prestazzjoni internazzjonali fis-sena. Id-duo Tenishia oriġinali kien infired amikevolment fl-2015 meta Cyprian Cassar kien iddeċieda li jwaqqaf il-karriera tiegħu bħala DJ biex ikun jista’ jikkomponi iktar mużika fil-waqt li Joven kompla imexxi l-avventuri ta’ Tenishia iktar il-quddiem.
Joven sploda fl-Asja fl-2015, partikularment fiċ-Ċina fejn fl-2017 irnexxielu issir l-iktar DJ internazzjonali ‘In Demand’ fejn daqq il-fuq min 30 darba fil-pajjiż f’sena waħda. Apparti il-produzzjoni tal-mużika li hu kompla jwassal għand l-akbar DJs fid-Dinja, Joven kompla joħloq affarijiet ġodda fosthom prestazzjonijiet prestiġjużi ma l-Orkestra Nazzjonali u il-live broadcasts ta’ Chasing Sunsets li fl-2020 leħqu il-fuq minn 10 miljun ruħ.
