Tal-Festi X’Għandna Inqas Minn Ħaddieħor?

“Tal-festi x’għandna inqas minn ħaddieħor?” Hekk kiteb Jerome Caruana Cilia fuq il-mezzi soċjali tiegħu fejn qal li din hija mistoqsija li ħafna dilettanti qed jistaqsu, “u għandhom raġun.”

“Filwaqt li nifhem l-isfidi li jista’ jkun hemm, però l-awtoritajiet għandhom ir-riżorsi u l-esperti biex ma jħallux lil tal-festa lampa stampa,” saħaq Caruana Cilia.

Huwa kompla jgħid li x-xogħol volontarju fil-festi jibda l-għada li tispiċċa l-istess festa, “ma jieqafx.”

“Jeħtieġ ikun hemm pjanar aħjar issa li qed jerġa’ jinfetaħ prattikament kollox,” kompla jtenni Jerome Caruana Cilia filwaqt li temm jappella lil min hu f’awtorità biex ma “jinjorax lil mijiet ta’ voluntiera fil-festi li huma komponent importanti mit-tessut kulturali ta’ pajjiżna.”

Dan is-suġġett bħal issa huwa fuq fomm dawk il-voluntiera kollha li jaħdmu fil-festi tal-bliet u l-irħula tagħna kif ukoll fil-Purċissjonijiet tal-Ġimgħa Mqaddsa. Wara id-deċiżjoni li ttieħdet rigward il-festa tal-Kunċizzjoni f’Bormla, li kienet it-tama ta’ ħafna li nerġgħu nibdew ngħixu dawn it-tradizzjonijiet sbieħ ta’ Pajjiżna, qisu bħal reġgħet waqgħet dalma ta’ inċertezza għas-sena d-dieħla.

Fost il-bosta kitbiet fuq il-mezzi soċjali dwar din is-sitwazzjoni, Mario Coleiro f’messaġġ fuq il-mezzi soċjali tiegħu qal li “minkejja l-appelli kolla li saru min diversi nies u għaqdiet minn Malta kolla biex il-purċissjoni tal-Immakulata Kunċizzjoni ta’ Bormla issir biex tkun l-ewwel prova għal-festi oħrajn xorta baqgħet tinżamm id-deċiżjoni li ttieħdet fil-bidu tas-sena li għal din is-sena ma jsirux l-ebda festi esterni.”

Mario Coleiro, President tal-Kumitat Festi Esterni Santa Venera kompla jgħid li “l-bniedem huwa uman u mhux tal-ġebel u għax uman kapaċi jirrifletti u jibdel fehmtu imma min ma jirriflettix u ma jismax it-talbiet ta’ ħafna nies u l-appelli ġenwini mill-poplu IVA IKUN TAL-GEBEL.”

Huwa temm jgħid li “Il-Knisja għanda bżonn tkun UMANA u mhux tal-ĠEBEL.”

X’taħseb int dwar dan?