Gypsy Ixomm Aktar Minn €26,000 Fi Flus Kontanti Mhux Iddikjarati Fl-Ajruport
Il-kelb tad-Dwana ta’ Malta Gypsy irnexxielu jaqbad €26,965 fi flus kontanti mhux iddikjarati fuq koppja Iżraeljana fis-sala tat-tluq fl-Ajruport Internazzjonali ta’ Malta.
Fi stqarrija d-Dwana qalet li waqt ronda li kienu qed jagħmlu Gypsy irreaġixxa b’mod pożittiv malli wasal ħdejn ir-raġel u l-mara li kienu fi triqthom lejn it-Turkija.
Il-koppja Iżraeljana meta ntalbu jiddikjaraw kemm kienu qed iġorru flus fuqhom wieġbu $18,000 (€16,490.73).
Madankollu, waqt tfittxija instab li kellhom aktar flus li b’kollox kienu jammontaw għal total ta’ €26,965 fi flus kontanti mhux iddikjarati.
Il-koppja ngħataw multa wara li ġew offruti soluzzjoni barra mill-Qorti li qablu għaliha.
